Гьунар ххисса политик ва депутат

Аьвдулмажид МахIрамов

[dropcap]Ф[/dropcap]евраль зурул 6-нний МахIачкъалалив Национал библиотекалуву хьунни Дагъусттаннал региондалийсса «Справедливая Россия» партиялул отделениялул каялувчи увчIлачIисса конференция.

Дагъусттаннал региондалийсса «Единая Россия» партиялул приемнайлуву Аьрасатнал ПаччахIлугърал Думалул депутат Аьвдулмажид МахIрамовлул ва ххуллухсса агьалинащалсса хьунаакьаву хьунни манзилданул журалийсса.

«Ватан» тIисса микрорайондалул агьалинал чулуха депутатнайн оьвкунни Цовкринская ва Аьбдулбасыровлул цIанийсса кIичIирттавух асфальт бутIаврил ва ми цIу буккан бан кумаг баврил хIакъираву. Шикку ялапар хъанахъисса агьалинал бусаврийн бувну, ва микрорайондалийсса кIичIиртту, къувирду дагьну, хаснува гъараллу ларчIсса чIумал, кьяркьаравун бювкьун, машинарттувагу занан къабюхъайсса даражалий бикIайсса бур. Депутатнал бувсунни кIицI лавгсса ххуллурду 2021-2023-ку шиналсса «Безопасные и качественные автомобильные дороги» тIисса миллатрал программалул сияхIрайн лавсун бушиву.

ЦIунтIиннал райондалия­сса Кимятли шяравасса ХIусман Маммадовлул масъала бия шяравусса байбихьулул школа зузи баншиврулсса оборудованияртту ва кьай-кьуй ласун кумаг баврил хIакъиравусса. Ванал бувсунни, 2013 шинал школалул идаралуцIух цIу ларчIун, щалва ччувччуну бивкIшиву. 2020 шинал «100 школ» тIисса проектрал лагрулий цIусса школа бувшиву ва цIанакулсса ппурттуву школа зузи бансса кьай-кьуй дакъа бушиву. Ва масъалалул хIакъиравугу депутатнал цала кумагчитурайн тапшур бунни ДР-лул КIулшивуртту дулаврил ва элмулул министерствалийн хасъсса аьрза чичаву.

МахIачкъалалив ялапар хъанахъисса Аьйшат Амирханова оьвтIий бия, Мирзабековлул цIанийсса 157-мур кIичIиравусса чIяру зивурду дусса къатрал тагьар ххишала дакъа нигьачIисса душиву буслай. Вай къатри бивкIун бур 2021 шинал бакьин бувансса сияхIравун бивчуну, амма кIул дакъасса багьана-сававрттайн бувну, бакьин баврил чIун руртун дур махъун ва кIулну бакъар ми та бакьин бантIиссарив. Ва масъалалул хIакъиравугу аьрза гьан бунни Госжилинспекциялийн.

Му бакъассагу, ва кьини депутатнайн оьвкунни давурттал щаллу баврил, ялапаршиндарал шартIру къулай даврил ва цаймигу масъаларттал хIакъираву. Аьмну манзилданул журалий депутатнал ххал бивгьунни 10-нния ливчусса масъалартту.
Аьвдулмажид МахIрамовлул цинявппагу масъаларттал хIакъираву бунни хасъсса маслихIатру ва ми щаллу баврил ялув ацIаву ларсунни цала аякьалийн.