Халкьуннал хIакинтурал тIимунийн бувну, дарувсса уртту-щинал, чурххал хIалгу ххуй бувну, инсантурал оьрмурдугу лахъи байсса бур. Так дакIний битияра, уртту-щин хIачIан бучIиссар 4 нюжмардий, яла, 7-10 гьантлийсса бяличIавугу дурну, цIунилгу тикрал дан. Уртту-щин хIачIлай буруча куну, хIакиннал чирчусса хъин буллалаву кьаритан ягу дяличIан дан къабучIиссар. Зура хIачIлачIисса уртту-щинаягу чара бакъа хIакиннахь бусияра. Ца зат ялагу: цукунчIав дарувсса уртту-щин мадатIаванну шагьрулул вив, ххуллуцI, заводру бусса ва мукунма цаймигу кIанттурдай.
Вай лув кIицI ларгсса урттул зун кумаг бантIиссар лахъай цIуцIаврища буруччин.
1) Сувра (мята)
Сувраравусса ментолданул ссихIирал ххуллурду гьартагу, марцIгу бувну, ссихI бигьаву бигьа шайссар. Зунна ххирасса чяйлувун бичин бучIиссар 3- 4 чIапIи суврарал.
2) ШанчIапIул тIутIи ятIулмур, дикIайссар кIялассагу
Вайннул оьттувусса къаххуймур холестерин чан байссар, оь хьюму байссар. Вайннул буруччайссар туннурду тромбардаща. Давление лахъайминнан ягу чурххал ххишаласса кIушиву думиннан оьттуву тромбру хьунсса нигьачIаву ххиссар.
3) Кьюнукьи (малина)
Шиву чIявуссар витамин С. Ва витаминдалул туннурду кIукIлуну битайссар.
Кьюнукьул кьяртал ва чIапIал кIиришиву лагь дайссар.
4)ЛухIи хъаса (черная смородина)
Инфекциялул азар (коронавирусгу хIисавну) дирсса чIумал, жунма кIулли кислород биял къахъанахъисса тагьар дикIайшиву. ЛухIи хъасарал ххуй дайсса дур клеткарттавусса кислородрал обмен.
Гьантлун букан бучIиссар 1 стакан хъасарал, хIувукачар хIала къабувну.
5)Узулликри (зверобой)
Иммунитетран чара бакъа аьркинсса белок гьарза шайсса бур узулликкурттал чяй хIачIларча. Вирусирттащал талатисса антителардугу – белокри.
Вай уртту-щинайн дагьайсса ца-кIира рецепт:
а) Узулликкурттал чяй
Дувара чяй, хIачIлачIияра гьантлун 1-2 стакан (ца стакан щаращисса щинавун дачIи чяйлул къуса узулликкурттал дичайссар).
б) Хъасарал чяй
Щаращисса щинал ца стакандалувун 2 хъун къуса хъасарал чIапIал дирчуну.10 минутIрава дигьияра,чяй хIадурссар.
ХIачIлачIияра гьантлун 1-2 стакан. БучIиссар вай чIапIив зура дуллалисса чяйлул заваркалувунгу бичин.
в) Кьюнукьул чяй
Мюрш дурну, кьакьан дурсса кьюнукьул кьяртал ца хъун къуса дичияра щаращисса щинал ца стакандалувун. 10 минутIрайсса щаращигу дурну, ца ссятрава дигьияра. ХIачIлачIияра бачIи стакан за дукан хьхьичI гьантлун 4-5-ла.
г) ШанчIапIул чяй
Банкалувун дичияра 4 хъун къуса шанчIапIул, ялун дутIияра дачIи литIра щаращисса щинал, дитияра хьхьурайния кIюрххилнин, дигу- диргьуну, холодильникраву дишара. Гьантлун 3-ла дукра дукан хьхьичI бачIи-бачIи стакан хIачIлачIияра .
ЦIуллуну битаннав.
ХIадур бувссар
Т. ХIажиевал
