Совет аьрал Авгъаннава буккан бувну 32 шин шаврин хасну, «Жагьилтал терроризмалийн къаршину» тIисса цIанилу, Гъумучиял школалий дирхьунни щалла республикалий машгьур хьусса «Чувшиврул дарс».

Муний гьуртту хьунни Лакрал ва Ккуллал районнал аьрали комиссар ХIасан Масуев, Лакрал ва Ккуллал районнал Авгъаннал ветерантурал советрал хъунама Аьбдулгъапур Оьма­риев, «ЦК, МП, СТ и ЦБС» МКУК-лул директорнал хъиривчу Малик ХIусманов, 1999 шинал Лакрал райондалиясса ополченцынал кьюкьлул хъунама МахIаммад Хъунбуттаев, М. Маннаровлул цIанийсса музейрал элмийсса зузала Шарипат Ккантулаева.
Ихтилатру бувминнал кIицI лавгунни Авгъаннал дяъвилий, интернационал бурж биттур буллай, жула саллатIнал дурсса къучагъшиврия. ДакIнин бивчунни та дяъвилий ливтIуми.
Ккаккан бувунни Авгъаннал дяъвилия бусласисса ва муний гьуртту хьуминнан хас дур­сса видеоролик. Му хIадур бувну бия Гъумучиял школалул директорнал хъиривчу Зугьра Кьурбановал.
Буттал КIанттул цIанийсса Хъунмасса дяъвилия зана къавхьуминнал ва гьуртту хьуминнал аьпа буруччаврил цIаний дуклаки оьрчIащал дуллалисса даврихлу Зугьра Кьурбанован буллунни «Год памяти и славы» тIисса Барчаллагьрал чагъар.
Интернационал бурж биттур буллай бивкIминнан хас дурсса мероприятияртту хьунни райондалул цайми школарттайгу.