Ватан дуруччултрал сийгу, хIурматгу

Лакрал райондалий кьиматрай ва сийлий гьарца шинах кIицI лагай Ватан дуруччултрал кьини. Биялсса агьлугу бавтIун, лайкьсса даражалий кIицI ларгунни байран ва ххуллухгу

Дайдирхьунни байрандалун хас дурсса мероприятияртту райондалул бакIчи Юсуп МахIаммадовлул ва кIирагу райондалул аьрали комиссар ХIасан Масуевлул дяъвилий жанну дуллуминнал гьайкалдануцI тIутIал шалка бишаврийну. Муния махъ тIутIив дирхьунни Вирттаврал чIирацI ва Вирттаврал аллеялий. Гьуртту хьунни ми иширттавух райондалул чIавааьралиталгу.
Ватан дуруччултрал кьинилун хас дурсса митинг тIитIлай, Юсуп МахIаммадовлул кIицI лавгунни февраль зурул 23-мур кьини ккалли хъанай душиву аьралуннал чувшиврул ва кьувватрал лишанну. Ватандалул цIаний жанну дуллуминнах аьпагу куну, Юсуп МахIаммадовлул барчаллагь увкунни Хъунмасса Буттал кIанттул цIанийсса дяъвилул ветерантурахь ва хIакьину ватандалул мюхчаншиву дуручлачиминнахь.
«Буттал кIанттул цIанийсса дяъвилул ветерантурал чувшиву ва къучагъшиву хьуссар ватан дуруччултрал ялун нани­сса никирансса ватан ххирашиврул хIакьсса эбратну. Ватан дуруччултрал хIакьинусса ник лайкьну дачин дурну най буссар ппухълунная шихуннай цIакь хьусса аьрали аьдатру», – увкунни Юсуп МахIаммадовлул ва чIа увкунни хIакьину Ватандалул цIаний къуллугъ буллалиминнан цIуллушиву, тIайлабацIу ва нигьачIисса къуллугърай бигьа-рахIатшиву.
ХIасан Масуевлул кIицI лавгунни Ватан дуруччултрал кьини хъанахъишиву Ватандалул цIаний жан ххира къадаву цал оьрмулул мяънану хьусса къучагъсса ва дакI кьянкьасса чиваркIуннал байранну.
— Гьарцагу заманнай жула оьрмулуву яла ххирану дацIлай диркIссар дакьаву, паракьатшиву ва саргъуншиву. Муниятур Ватан дуруччултрал байрандалул авадансса ва цIанихсса тарих бусса. Ва байрандалун цIа ци заманнай цукунсса диркIхьурчагу, мудангу диркIссар Ватандалул цIаний къуллугъ буллалиминнал хIурматрал лишанну, – увкунни ХIасан Масуевлул ва чIа увкунни дакьаврийнусса ххувшавур­тту ва хьхьичIуннайшивуртту.
Муния махъ дуклаки оьрчIал дурккунни аьрали темалун хас дурсса назмурду, райондалул магьирлугърал къатлул зузалтрал ккаккан дурунни ватан ххирашиврул темалун хас дур­сса концерт.
ЧIивисса лакрал миллатрал Хъунмасса Буттал кIанттул цIанийсса дяъвилий дурсса чувшивурттугу кIицI ларгун, байрандалиясса сюжет ккаккан дурунни НТВ каналданул.