«Дунияллий чIярусса оьсса азарду бат дан бювхъуссар анжагъ вакцина бувккун мукьах»
ЦIана интернетравугу, радио-телевидениялийгу, укунма агьлу бавтIнийгу цинявннал зума-мазрайсса затну бур вакцина.
Мунийн вихшала къадихьлахьиссагу бур, цайнма яржа бияннин ссавур дакъа ялугьлагьиссагу бур. ЦIумур, ци духьурчагу, мудангу най дуна халкьуннаву кьамул къашайхха. Сававртту цагу-кIирагу дакъар.
Жугу, чIивину-хъунну хъирив лаян кунма, жула лагма-ялттунахьхьун буллай буру суаллу: «Вакцина бантIий бурув, буллай бурув-бакъарув» тIисса суаллу.
Зульфия ХIажиева, журналист:
– На нава ттигу къахIадурда вакцина бан. Вакцина буккан бувнугу хъунмасса хIал къалавгуннихха. Цалсса сислай бакъара. Ва ца. Ялагу на нара инттура лахъав му азар, мунияту ттул оьттуву ттигу антителарду бикIантIиссар.
Зайнаб Аьлимирзаева, МахIачкъалаллал администрациялул пресс-службалул хъунмур:
– Коронавирусрал азарданул на къашавай хьура ссуттил. Му азардания махъ чани чан хьусса хIисав хьунни. Хьунугу на уттигъанну ттула даврил уртакьтуращал дував прививка. Му даннин жу дуларду поликлиникалий циняр аьркинсса анализру. Вакцина бувну хъиривми гьантрайра га нава ссуттил къашавай бивкIсса коронавирусрал азарданул куннасса симптомру ялун лирчуна. ЦIий дия ттаркIру, щала чурх бяхкIуну бия. Мукун ца шанма гьантлийгу бивкIун, на къулай хьура. Ттущал вакцина бувсса ттул коллегахъул тIурча, цичIав симптомругу ялун къалирчунна, ттуяргу ххуйну бур. Утти, 21 гьантта лагайхту, кIилчингу гьантIиссару вакцина бан. Му цурда вакцинациялул кIилчинмур ятIапри.
Пат1имат Аьбдуллаева, Республикалул офтальмологиялул азарханалул хъунама хIакиннал хъиривчу:
– На вакцина бан рязиминнавассара. Дунияллий чIярусса нигьачIисса азарду бат дан бювхъуссар аьрщарай вакцинарду буккан бувну махъ. Циярда вакциналияр, коронавирусрал азарданиямур нигьачIишиву цимилгу хъуннассар. На нарагу лахъав азар уттигъанну, мунияту, антителарду оьттува бат шайхту, чара бакъа прививка дантIий бура. Амма чансса бакъар, коронавирусрал къашавай бивкIнугу, оьттуву хъинну чансса антителарду буссагу. Мунияту, кIилчин лахъарча азар, му хъиннура жула чурххан заралсса дусса дур. Ттул пикрилий, азар дацIан дансса чаран цалсса вакцина бур.
Мирза ХIажирамазанов, ишбажаранчи:
– Ттул даву хъунмурчIин Дагъусттаннал кьатIув гьан багьлагьисса, чIявуну самолетрай лехлан багьлагьисса дур. Шаппа ттул, кулпат, оьрчIру бакъасса, хъунив хьусса нину-ппугу бур, миннайн азар къалахъан, ми буруччинсса кьасттирай на нава пикри бав вакцина бан.
ПатIимат Шагьмурадова, МахIачкъалаллал 42-мур оьрчIал багърал тарбиячи:
– Жул даврийгу цIухлай бия му вакцина бантIий бурувкьай ягу бакъарув тIий. Цалсса жула хушрайсса даву душиву чIалай дур, яла гихунмай къакIулли. На къарязира вакцина бан, ттула оьрчIайнгу бан къарязиссара. Хъирив лаллай, кIул дуллай, ттигу хъинну дурчIин къархьусса азарданул вакциналийн вихшала дакъар.
Фаила Адамова, Чапаевкаллал школалул ингилис мазрал учитель:
– На вакцина бан рязиминнавух бура. ЦичIав нигь-ццахгу ттун мунияту чIалай дакъар, цурда азарданияр ххисса. ХIакьину къашавай хьунавав, гьунттий азар лахъанавав тIий, щак-щуклий, ццахлий яхъанайнияр, бувну вакцинагу, дакI паракьат хьуну ччай дур.
ХIусман ХIусманов, Москавуллал 15-мур азарханалул анестезиолог-реаниматолог, Европанал анестезиологтурал обществалул член:
– Аьрасатнаву коронавирус ппив хъанай дайдишайхту, жулмур азарханалия госпиталь бувссар, нагу тания шихунай «ятIул зоналий» зий ура, иш-тагьар ттунна ккарккунни ва чIалай дур хIакьинусса кьинигу. Март зуруй коронавирусрал къашай хьунав нагу, личIину захIматну къавхьунав. Амма, кIилчингу вара азарданул ххутIахьхьун ирияврия нигь духьувкун, цIунил коронавирус дирми захIматну къашай хъанай бушивугу хIисавравун лавсун, на «Спутник V» вакцина бував. Жунма цинявннан ххуйну кIулли антитела цIакь шайшиву инсан къашай хьуну цаппара нюжмардува. Экспертътуран цIанакул мяълумну къакIулссар цуксса хIаллай кIилчин къашай къашайссарив, ковидрая махъ цуманал цукунсса иммунитет шайссарив. Гьарманал иш личIи-личIину багьлай бур, ца ккуццуйсса иш бакъар. Цавайннал къашай хьуну мукьахсса иммунитет кутIасса чIумуйсса дур, ттулгу мукунсса иш бия.
Ковидрал къашай къавхьуминнангу, агана вакцина бан къабучIисса кIану бакъахьурча, маслихIат бувавияв дувара прививка куну. ВОЗ-рал хъунаманал лахьхьу, февраль зурул кIинний, баян бунни, «Спутник V» ххуйсса хIасиллу ккаккан дурсса вакцина бушиву, 91 % эффективностьрал душиву. Вакциналул инсан уручлачиссар коронавирусрал захIматну къашавай шаврища.
Ххадижат Аьбдуллаева, юрист:
– На коронавирусрал къашай хьунав кIива зурул хьхьичI. Бусанна ттунма тамашагу, тIааьнгу бивзмуния. Волонтёртурал уквасса даруртту шаппай биян бувна. Участокрал терапевт цуппа хъирив бувкIуна, гьутрурдай рентген бишин на буцин.Сайки гьарца кьини гьантлун кIийла оьвчайва, цукун бура, ци тагьар дур т1ий. Ттул кIия арс ур школалийн заназисса, вайннайнгу, ласнайнгу ттуяту азар къалархъунни. Антитела духьувкун, вакцина къабуванна.
АьбдулхIамид Кьурбанов, инженер-программист:
– На цалсса ташвишну ура, буван хъинавав, къахъинавав, бувну хъинавав, къабувну хъинавав тIий. Хъирив авцIуну ура, хIакинтал, экспертътал ци тIий бурив ккаклай. ВОЗ-рал Аьрасатнавусса вакил Мелита Вуйновичлул «Россия 24» телеканалданул журналистурахь бувсунни, ВОЗ-рал хъуними Аьрасатнал вакциналия цIардай бушиву ва вакцинардах мюхтажсса кьатIаллил билаятирттайн тIайла буккавриха зий бушиву. Буккав Магърибуллал билаятирттай жулва вакциналия хIайраннугума бушиврул хавардугу, хIатта, 1957 шинал космосравун цалчинсса спутник гьаз хьуния мукьах, Аьрасатнал цамур даву къадурссия дуниял хIайран дувансса, ва уттисса давугу мура даражалийсса давур. Америка ва Европа мяшнугума бур му иширай. Бурганну. Бюхъайссара на вай хIуччардал вакцина буван къай-къайтIи увангу.
Расул Оьмаров, предприниматель:
– Буванна нагу, циняв хъуни къуллугъчитурал бувну мукьах. ЦIанакул ми, цайванияр, агьалинай аьтIий бунуккар. Гьарца кьини гьантлун ацIния ххюйла вакцина букъавну чара бакъашиврия гъалгъа тIурча, къагъ-байтурман хьусса инсантурал бакIурдиву загьир хъанай бухьунссар буниялттунгу буван аьркиннихха тIисса пикри.
ЦIувххуссар
З. АьбдурахIмановал
ва П. Рамазановал.
