[dropcap]Ф[/dropcap]евраль зурул 6-нний МахIачкъалалив Национал библиотекалуву хьунни Дагъусттаннал региондалийсса «Справедливая Россия» партиялул отделениялул каялувчи увчIлачIисса конференция.
Шиккува бувчIунни чIал къавхьуну Москавлив хьунтIисса «Справедливая Россия» партиялул XI-мур Съездрайнсса делегатъталгу.
Конференциялул даву дайдихьлай, партиялул председатель Камил Давдиевлул балжийну бувсунни махъсса кIира шинал лажиндарай дурсса даврия, бартбивгьусса мурадирттая.
– Ларгсса шинал сентябрь зурул 20-нний хьусса бувчIавурттал кампаниярттал хIасиллайн бувну, партиялувун увчIуну уссия 330 депутат. Ванил исват буллай бур партиярдаву «Справедливая Россиялул», кIилчинмур ххуттай душивруцIун, депутатътурал сияхIгу ларайсса душиву, – увкунни Камил Давдиевлул.
Конференциялийгу чIурду буллуну, партиялул каялувчину цIуницIакул увчIунни ДР-лул Халкьуннал Мажлисрал председательнал хъиривчу, МахIаммадлул арс Камил Давдиев. Му бакъассагу, региондалул отделениялул сияхIрайн лавсунни 22 инсан, миннава – 10 депутат Халкьуннал Мажлисравасса.
Москавлив хьунтIисса съездрай гьурттушинна дан бувчIунни: Камил Давдиев, Мурат Пайзуллаев, Ислам ХIусайханов, ХIажимурад Оьмаров ва Виктор Яценко.
Конференциялул гьурттучитурал ххал бивгьунни 2021 шинал сентябрь зуруй хьунтIисса ПаччахIлугърал Думалувунсса ва Республикалул Халкьуннал Мажлисравунсса бувчIавурттал хIакъиравусса масъаларттугу.
Ахирданий Камил Давдиевлул барчаллагьрал чагъар ва Сергей Мироновлул цIаниясса лу буллунни Лаващиял райондалийсса партиялул отделениялул ветеран-председатель МухIаммадрасул Баркаевлун. Конференциялий партиялувун кьамул бунни ва билетру тапшур бунни Жагьилтурал парламентрангу.
Шиккува кIицI лаган, Камил Давдиев каялувшиву дуллай ур Республикалийсса «Справедливая Россия» партиялул фракция сакин дурния шинай хIакьинусса кьининин. Ванийнугу исват хъанай бур Камил даву канилух дурксса, зунсса гьунаргу, гъирагу бусса каялувчи ушиву. Камил Давдиев увчIуну ур мукьилчинмур, ххюлчинмур ва ряххилчинмур ДР-лул Халкьуннал Мажлисрал бувчIавурттал депутатну. ХIакьину республикалий ва ккаллину ур ца яла профессионализм ххисса ва агьалиначIан гъансса политикну ва депутатну.
