Аьрасатнал ПаччахIлугърал Думалул депутат Аьвдулмажид МахI­рамовлул ва ххуллухсса аьрххи хьунни Каспийск шагьрулий­сса «Дагъусттаннал яруннал микрохирургиялул центрданийн».

Центрданул азарханалий МахIрамовлул ххал бивгьунни къашайшалт хъин буллали­сса палатарду, бунни миннащал цIуллу-сагъшиврул хIакъиравусса цIухху-бусурду. Ххал бивгьунни оьрчIансса кабинетру, центрданийсса оборудованияртту.
Дагъусттаннал Яруннал микрохирургиялул центр зий байбивхьу­ссар 2002 шинал. Муния шинмай 200 азарунния ливчусса къашайшалтрал дурну дур яруннал диагностика, бувну бур ттизаманнул технологиярттайну 30 азарвахъул операцияртту. Центрданий дур лавайсса квалификациялул 35 хIакин-офтальмолог зузисса 9 отделение.
Центрданул отделениярттал ялтту увккун махъ, МахIрамов хьунаавкьунни хIакинтурал коллективращал, сукку бунни шикку медициналул кумаграл даража гьаз баврил, ларайсса технологиярттал методру ишла даврил, диял дакъа­сса оборудованияртту щаллу даврил хIакъиравусса масъалартту.
Центрданул даврин лавай­сса кьимат бишлай, депутатнал барчаллагь увкунни цинявппа хIакинтурахь. ХIакинтурал коллективрал цIания Аьвдулмажид МахIрамовлухь барчаллагь увкунни центрданул хъунама хIакин Аьли­оьмар АхIмадовлул.
Шиккува кIицI лаган, январь зурул 15-нний ЦIуссалакрал райондалиясса Чапаевкаллал шяравасса Камиллул арс Аьлиоьмар АхIмадов ивтссар Дагъусттаннал яруннал микрохирургиялул центр­данул хъунама хIакинну.