«Ростелекомрал» хIасиллу ккалли дансса дур

«Ростелекомрал» хIасиллу ккалли дансса дур

Ларгсса нюжмаркьини «Ростелекомрал» Дагъусттаннайсса филиалданул хъунама Руслан ЯрахIмадов, уттинин цала дурсса давурттал хIасиллая бусансса мурадрай, хьунаавкьунни республикалул журналистътуращал. ХIакьинусса кьини «Ростелеком» жула билаятрай ца кьуват бусса, гьарца аралуву вайннал дуллалисса хIаллихшиннарду ишла дуллалисса, хъуннасса перспектива дусса ва Аьрасатнал экономикалуву агьамсса кIану бугьлагьисса компанияр. Аьрасатнал Кьиблалий буссар ванил кIива филиал – Кьиблалул ва Ухссавнил Ккавкказуллал федерал округрал.


ХьхьичIва «Дагсвязьинформ» ОАО-ну бивкIсса идара 2011 шиная шинмай хъанахъиссар шиная шинайн цIакь гуж хъанахъисса «Ростелекомрал» жулла республикалийсса филиал, цуппагу Дагъусттаннал экономикалувун инвестортурая маэшат хьун буллалисса.
Руслан ЯрахIмадовлул бусаврийну, махъсса кIира-шанна шинал мутталий филиалданул ххуйсса арцу дучIан дурну дур республикалул хазналувун. Ларгмур шин пандемиялул шин диркIнугу, га шиналгу филиалданул зузалтрал хъунисса агьамсса давуртту дурну дур республикалул шагьрурдай ва щархъаву. Масалдаран, цIу буккан бувну бур связьрал 15 «кюру»: духмур оборудование дуркьун, дирхьуну дур цIусса, баххана бувну бур тталлу ва зунттал щархъаву интернет, телевидение ва телефонну зузи дансса связьрал ххаллу, хIасил карантиндалул чIумал студентътал, дуклаки оьрчIру шаппа-шаппа буна дуклаки бансса шартIру дузал давриха зий бивкIун бур.
Ларгсса шинал мукунна хъинну тIалав хьуну дур агьалинал дяниву вайннал дузал дуллалисса бизнесралми хIаллихшиннардугу. Масалдаран, чIявусса жула ишбажаранчитурал интернетрал кумаграйну цала-цала ттучаннаву, производствалул идарарттай видеонаблюдениялул оборудование дирхьуну дур, пишакартал шаппа-шаппа буна, производство дацIан къаритансса шартIру хIасул дурну дур.
Руслан ЯрахIмадовлул мукунма кIицI бунни, Дагъусттаннай хIакьинусса кьини «Ростелекомрал» щурущи дурну душиву кIира программа – «Устранение цифрового неравенства» (УЦН) ва «Универсальная услуга связи» (УУС). Цалчинмур программалул лагрулий интернетрал хIаллихшиннардил уттинин дузал дурну дур 163 шяравалу. Ва программалийн бувну 2021 шинал интернетрал ххаллу дуцинтIиссар 309 шяравун. Аьмну ми хъанахъиссар оптоволоконнал ххаллал 3 азардаксса км. 2020 шинал Госуслугардал, МФЦ-лул, Пенсион фондрал хIаллихшиннарду ишла даншиврул дакъа, укунна кинорду ккаклан, социал сетирдавун бухлан ва цаймигу хIаллихшиннарду ишла дан агьалинал ттучаннаву ва базардаву яла тIалавмур электрон хъус диркIун дур Wi-Fi оборудование.
КIилчинмур программалийн бувну, Аьрасатнал регионнай ккаккан бувну буссар агьали яхъанахъисса кIанттурдай таксофонну бишин. МуничIансса манзилгу бикIан багьлай бусса бур так ца ссятраяр ххишаласса чIун харж къахьунсса. Ва программалул лагрулий Дагъусттаннай уттинин бивхьуну бур сотовый связь дуцин захIматсса кIанттурдугу хIисавну 1076 таксофон. Щаллу къашайсса бур зунттурду лахъсса захIматсса кIанттурдай спутникрал антеннарду къадирхьунугу. «Ростелекомрал» таксофонная 2020 шинал хьхьичIсса ряхва зурул мутталий 16400 оьвчаву дурну дур. Ми аьмну хъанахъиссар 168 000 минутIрайсса оьвчавуртту. 2019 шинал мура чIумул хIасиллах бурувгун, оьвчавуртту хьуну дур 63 360 минутIрайсса.
Бувсунни Дагъусттаннал филиалданул хъунаманал республикалий цивппа чялишну зий бушиву «Цифралул экономика» проект дузал даврихагу, 464 социал идаралийн дурцуну дур вайннал пишакартурал интернет.

Читайте также: