[dropcap]Ф[/dropcap]евральданул 3-нний «Дагестан» РИА-лий жулла республикалийсса ОНФ-рал активистътуращалсса пресс-конференция хьунни. Журналистътурахь цIуну ххалдиргьусса ва чIал къархьуну Дагъусттаннай щурущи дуван хIадур дуллалисса «Карта стоков» тIисса проектрая бусан увкIун ия Дагъусттаннайсса ОНФ-лул регионал исполкомрал каялувчи Жамалуттин Шигьабуттинов, «Каспийский природоохранный центр» АНО-рал хъунама Заур ХIапизов ва ДГУ-лучIасса Экологиялул ва лябуккулул институтрал хъунама, ОНФ-лул эксперт Аьлимурад ХIажиев.
ЦIана экологтал ва ва масъалалулсса бан бакIрайн лавсъсса ОНФ-лул экспертътал зий бусса бур му карта даншиврул, цIубакIрай Каспий хьхьиривун, Октябрьданул революциялул каналданувун , Ак-Гель бярав чапалсса щинну чату, цуми кIанттурдаяту най дурив хъирив лаллай.
«ХIакьинусса кьини Дагъусттаннал неххардил, бярдал, хьхьирил масъала хъинну захIматсса бур. ЦIинцI-ччюрк дакъасса шяравалу дакъар я зунттаву, я арив. Агьалинал баччи бакъа чун-чун дунугу экьилирчусса ччюрк дагьлай дур Сулакьравун, Терекравун ва Самурданувун. Миннул ларсун, Каспий хьхьиривунгу. Къаххуйсса тагьар дур канализациялул щин хьхьиривун ва неххардивун, бярдавун нанисса иширтталгу. ХIакьинусса кьини жул экспертътурал ххал дирхьуссар МахIачкъалалия Каспийскалийн бияннинсса щала хьхьирил зума. ЧIявусса кIанттурдай лавсъссар щинал тагьар ххал дансса пробарду. Анализру дурну махъ чIалантIиссар ми щинну нанисса идарарттал биян бувсса зараллу»,– увкунни Жамалуттин Шигьабуттиновлул.
Экологиялул институтрал хъунама Аьлимурад ХIажиевлул кIицI бунни укунсса журалул хъиривлаявуртту уттинингу дуршиву Ак-Гель бярнил щин ларсун. Гиву балугъру бухлагаврил хъунмур сававнугу диркIун дур махъ ппурттуву чIаравсса цIуну дурсса лахъ къатрава нанисса канализациялул щин. Хъирив лавну, дурсса анализру тасттикь хьуну махъ прокуратуралул къадагъа дирхьуну дур вай иширттан. ЦIана бярав чапалсса щин нанаву дацIан дурссар. Заур ХIапизовлулгу мукунма ххи бунни республикалий чансса жагьилтал бакъашиву жулла уникалсса тIабиаьт дуруччинсса хIарачатрай, экологиялул акцияртту, субботникру дуллай, цащава бан шайсса хIарачат буллай. Вайгу хIадурну бусса бур, ванал бусаврийну, хьхьиривун чапалсса щин нанисса кIанттурду ххал бувну, карталийн лахъан буллансса давривух гьуртту хьун.
Жамалуттин Шигьабуттиновлул тавакъю бунни жулла тIабиаьтрай дакI цIуцIисса цинявппагу инсантурахь, неххардивун, хьхьиривун, КОР-данувун чапалсса щин нанисса хIисав хьурчан, Дагъусттаннайсса ОНФ-лул Инстаграмравун чичин, баян бан.
