Наркомания – му балаллучIансса ххуллур

Лакрал райондалул бакIчи Юсуп МахIаммадовлул каялувшиндаралу райондалул администрациялий хьунни агьалинал дянив наркомания ппив хьун къаритаврил ялув бавцIусса комиссиялул батIаву.

Муний гьуртту хьунни низам дуруччай органнал ва цIуллу-сагъшиву дуруччаврил зузалт, рувхIанийсса идаралул вакилтал, шяраваллал администрациярттал бакIчитал.
Наркотикру закондалий бакъа ишакаш баврийн къаршисса даврил хIасиллая буслай, Аьрасатнал МВД-лул «Лакский» МО-лул каялувчи МахIаммад Рамазановлул кIицI лавгунни низам дуруччай органнал зузалт дуллай бушиву наркотикру шайсса ххяххияртту духлаган даврил ва аптекарттай наркотикру хIала бусса затру даххаву дайщун даврил ххуллийсса мероприятияртту. Администрациялул юридический отделданул каялувчи, наркотикирттайн къаршисса комиссиялул секретарь Кьурбан Дандамаевлул кIицI лавгунни наркоманиялул тагьар итталу дургьуну бушиву.

Республикалул наркологиялул службалул сияхIрай усса ур мукьа инсан.
Райондалул магьирлугърал, жагьилтурал иширттал, спортрал, туризмалул ва библиотекалул системалул центрданул оьрчIал спортшколалущал цачIуну дуклаки оьрчIал дянив дуллай бур «Спорт без наркотиков» тIисса мероприятияр­тту. Агьали даврил дузал байсса центрданул ляхълай бур гъинтнил каникуллал чIумал дуклаки оьрчIру даврил бугьансса чаранну.
Наркомания ппив шаврийн къаршисса давривух гьурттуну бур райондалул цIуллу-сагъшиву дуруччаврил зузалтгу. Медициналул зузалтрал ччя-ччяни сакин дуллай бур школарттай наркотикру ишла баврия биллали­сса заралдания бусласисса хьунабакьавуртту.

БатIаврил хIасиллу дуллай, хIукму бунни низам дуруччай органнал зузалтрал, кIулшиву дулаврил ва цаймигу идарарттал цачIуну гужлан дан наркоманиялийн къаршисса даву. Кьамул дунни му мурадирай 2021 шинал дантIисса даврил плангу.