Расул МахIаммадов, динчи:
– Уттинин на вакцина баврия архну авцIуну уссияв, му дин дуллалисса бусурманчувнан бучIисса бурвав, бакъарвав тIий, кIихIуллану унутIий. Татарсттаннал Бусурманнал рувхIаний управлениялул миннат бувна му вакциналул состав ашкара бувара куну. Москавуллал РувхIаний управлениялул (ДУМ-рал) председатель Ильдар Аляутдиновлулгу вакцина хIасул бувсса Гамалейл цIанийсса центрданул пишакартурахь вакцинарду хIалалсса бусса-бакъасса бувчIин бувара тIисса миннат бувна. Вакцина хIасул бувминнал жаваб дуркIунни, бусурманнан ишла дуван къабучIисса компонентру, учиннуча, дунгъузрал желатин ва цаймигу къадагъасса затру дакъашиву. Утти дакI пахь кувкун, на хIадурну ура вакцина буван.

Ххадижат ЦIаххаева, исламрал институтрал студентка:
– На къашай хьунав, ичIу­вациригу къашай хьуна, антитела духьукун, цалсса вакциналия пикри къабуварду.

Таибат Мусаева, исламрал лаххиялул ттучандалул хъунмур:
– Дунияллийцири чIявуми бусурман билаятирттайсса динийсса ккураннал каялувчитурал ва аьлимтурал мукIрушинна дунни коронавирусрал прививкарду бусурманнан дуван бучIишиву. Малайзиянал, Индонезиянал, Турциянал, Великобританиянал ва Египетнал билаятирттай прививка дуван бучIишиву исват буллали­сса фетвардугума итадаркьунни. Пандемия дацIан дувансса, вирусран ххуллу кьукьинсса цамур чаран бакъахьукун, вакцинардая махъаллил хъанахъаврил мяъна чIалай дакъар. Инсантурал оьр­му бивкIулул бухкIуллийн биян буллалисса азар дур коронавирус. Ци барчагу бувну, буруччин аьркинни. Инсантал хха­ссал буван аьркинни, вирусран ххуллу кьувкьуну. Чаран бушиврийн щукругу бувну, прививкарду дуллан аьркинни чантI увкусса инсантуран.

Аят Рамазанова, Лакрал театрданул администратор:
– Коронавирусраща буруччинсса прививкартту даврил аваза халкьуннаву чансса бакъар, кувннахь кув цIухху-бусу буллай, инсантал ташвишну бур. Нагу мукунма бура, иммунитетгу цIакьсса дакъани, бигьану бакъар му иширайн гьуз учин.
Щалагу дунияллийх баян буллай бур, вакцина инсантурал цIуллу-сагъшиврийнсса ххуллур, мюхчаншивур, цала цивппагу, гъан-маччамигу буруччавур тIий. Бур цамур куццуй тIиссагу. Ци бухьурчагу, инсантурахь ихтияр дур цанма дакIнин ччимур бансса: ччарча, дан прививка, къаччарча, къадуван. Нагу цал­сса ссавур данна.

Шагьалай МахIамма­дова, ДР-лул лайкь хьусса артистка:
– Коронавирусрал азардануща буруччин прививкартту дан аьркинссар тIисса оьвчавурттацIун на бакьлакьиссара. Вирус загьруман­сса душиву чIалай дур мачча-гъанмигу, лагма-ялттусса инсанталгу литIлатIаврийну. Ттул давугу инсантуравух хIала-гьурттусса, личIи-личIисса шагьрурдайн гьан-бучIан багьайсса дур. Мунияту, навагу бурувччуну бикIан, цаймигу буруччин, ттула буржри тIиссара прививка дан.

Альбина ХIасанхIусай­нова, косметолог:
– Дунияллийх коронавирусрал азарданул щатIи бивщукун, нагу, вайми инсантал кунма буссияв, дурвав му вирус, дакъарвав тIий. Жунма ххан бикIай вай лагма-ялтту хъанахъисса ишру жула чIарах бувккун гьан­сса кунма. Мукунсса пикри ттунгу бия, амма хар-хавар бакъа на къашавайминнал ххуттавух хьунав, азарханалийн багьунав. Барчаллагь МахIачкъалаллал лахъай азарду хъин дай центрданул хIакинтурайн, захIматсса, гъалгъа тIунмагу къахъанахъисса тагьарданува личин бунна.
Ттул кIива оьрчI бур, на вайннахьгу маслихIат бував прививкартту дуван, цала цивппа бурувччуну хъинни, ци хьувивав тIий ццаххандарай яхъанайнияр.

Шамсуттин Къапланов, Дагъусттаннал халкьуннал артист:
– Ва яла ларгсса шин жула билаятрангу, республикалунгу къабигьасса шин хьунни. ЧIявусса машгьурсса инсантал аьпалувух хьунни. ХIакьинусса кьинигу баллайнма бур ва къашавай ур,та къашавай ур тIисса пашмансса хаварду. Медициналул зузалт леххаву тIий бур, прививкартту дара, бурувччуну бикIияра тIий. Нагу миннал тIутIимуний рязиссара. БувчIлай бур инсантал нигьа бувсун бушиву, цалий къабавцIусса хаварду баллай бушиву. Амма мяълумну чIалачIисса, кувнная кувннайн лахълахъисса азар халкьуннавух щуруй дуссагу исватну чIалачIисса иш бур. Мунияту прививкартту дуван аьркинни тIиссара.

Абут1алиб Куршалиев, ДГТУ-рал физкультуралул ва спортрал кафедралул каялувчи, АьФ-лул лайкь хьусса тренер, билаятрайгу, дазул кьатIувгу цIа дурксса лачIунукку:
— На къашавай хьунна коронавирусрал азарданул, мунияту цалсса ттуйн къабунни вакциналул ххалаххи. Ттул пикрилий, му ххалаххи баврия зарал хъанай бакъар, хъиншиву дакъасса, хаснува къашавай къавхьуминнан. Бувну хъиннихха, му бала-хатIасса цIуцIаврил ххутIахьхьун иривнунияр.

Хизри РахIимоВ, цIа дурксса спортсмен, ДР-лул Ояма-каратэлул президент, лухIимур мухIулттул заллу:
— ТIайламур бусан, на ттигу къабував коронавирусрал вакциналул ххалаххи. Цалсса анавар уклай акъара. Уттигу цаппара манзил лавгукун, чIалантIиссар буван бурив ягу бакъарив. Гьалбатта, муния зарал бакъашиву мяйжан хъанай бухьурча, бувну хъинни, къашавай къахьуншиврул. Буллалиссагу чансса бакъархха.

ЦIухху-бусу бувссар
П. Рамазановал,
А. АхIмадовал,
ХI. Аьдиловлул