Буденный, Ворошилов ккавкмур, Жамалуттин Муслимовлущал ца сахIналийн бувкмур
Уттигъанну цила оьрмулул юбилей кIицI ларгунни ДР-лул искусствалул лайкь хьусса зузала, ДР-лул ПаччахIлугърал премиялул лауреат, АьФ-лул Театрал ишккаккултрал союзрал член, хореограф, балетмейстер, Дагъусттаннал къавтIаврил «Лезгинка» ансамбльданул Школа-студиялул каялувчи Къапиева Тарият Давудлул душнил. Жул дянивсса ихтилатгу хьунни ванил оьрмулиясса ва оьрмулул ца букъацай бутIану хьусса къавтIавриясса.
Оьрмулул юбилей ци асардащал хьунадакьав тIисса суалданухьхьун жаваб дуллай, Тарият тIий бур:
– Январьданул 15-нний, кIюрххил ссят 11-нний, Оьруснал театрданул сахIналий буру, ДАССР-данул 100 шинал юбилейрал мажлисрайнсса генеральный репетиция дуллай. ДР-лул культуралул министр Зарема Буттаева бувкIуна на барча буван, хъункIултIутIал хъунмасса кацIгу, Министерствалул чулухасса Барчаллагьрал чагъаргу лавсун. Мукуна увкIун ия ттухь юбилей барча учин «Лезгинка» ансамбльданул каялувчи Жамбулат МахIаммадовгу. Бия цайми-цаймигу. ЦIанасса бигьа дакъасса чIумал, хьхьичIва кунма, инсанталгу бавтIун, мажлисру буллан хъанай бакъар. Поэзиялул театрданул пландалий дур ттул творчествалул вечер дувансса, Национал библиотекалул пландалийгу дур «Достояние республики» тIисса программалул лагрулийсса батIаву дувансса. Оьрмулул шинная тIурчаннив, на щукрулий бура ттунма нясив бувсса кьадарданийн.
Бувну бур Тарият Къяннал шяравасса ХIажиев Давудлул (Щайховхъул) ва Гъумучатусса Буттаева Султан-ПатIиматлул (Аьллабуттахъул) кулпатраву. Щайххъул сий-кьини дусса, дахху-ласулухун багьсса агьлу бивкIун бур, миннал Владикавказрай цалва ттучанну, машлул кIанттурду бивкIун бур, мукунма машай Дянивмур Азиянавунгу лагайсса бивкIун бур. Аьллабуттахъулгу жяматрал дянив бусравсса, махъ нанисса агьлу бивкIун бур.
Тарият хъунмасса тIайлабацIулун ккалли буллай бур цуппа Каспийскалий, тарбиялул, магьирлугърал даву хъинну усттарну дачин дурсса шагьрулий, ляхъаву. Ниттил ниттил Буттаева Муъминатлул биялалийну оьрмулул 5 шинаву ва занан бивкIун бур Пионертурал ва школьниктурал къатлувун, балетрал студиялийн. Тариятлуйн микку тIайлаавцIуну ур ххаллилсса педагог, Душанбе шагьрулия ласнащал Каспийскалийн бивзсса Лямина Мария Игнатьевна.
Тарият 1-мур классравун лавгун бур Каспийскаллал 2-мур школалийн. Ванин ххуйну дакIний дур та школалун Совет Союзрал Виричу А. Назаровлул цIа дизлазисса чIун, Виричунал нину-ппугу бувкIун, цивппа линейкалий бавцIуну бивкIсса куц.
Школалийн лавгун махъ микку миллатрал къавтIавурттал кружокрайнгу занан бивкIун бур паччахIлугърал «Дагъусттаннал балайрду ва къавтIавуртту» тIисса ансамбльданул артистну ивкIсса Вагьабов МахIаммад ВагьабовлучIан. Мунал ва цала ансамбльданувунгу бувцуну бур.
Тариятлун 9 шин диркIун дур, Каспийскалийн «Лезгинка» ансамбльданул художествалул каялувчи Танхо Израилов Москавлив хьун нанисса Дагъусттаннал искусствалул ва литературалул Декадалийн буцинми язи бугьлай увкIсса чIумал. Мунал ансамбльдануву къавтIисса яла чIавамур чут – Тарият ва ванияр цахъи хъунасса оьрчI, язи бувгьуну бур.
Танхо Израиловлул бивхьусса номердануву 1960-ку шинал Декадалий Москавлив Кремлилул Бухмур театрданул сахIналийн Тарият бувккун бур машгьурсса къавтIала Жамалуттин Муслимовлущал архIал. Тамашачитурал хъинну ххуйну кьамул бувну бур му номер.
– Га нюжмар хьуна тачIав хъамакъаритансса, жунна дуллалисса дукрардая тIайла хьуну, цимурцаннуйн дияннин. Чайковскийл залданийн бияннин, жу шагьрулий цимивагу кIанай концертру ккаккан дурссия. Мукун га аьрххилийсса концертирттал тамашачитуравух ттун ккавккуна цува Буденный: паччахIлугърал ложалий щябивкIсса хъамаллураву хъуни ссирссилттащалсса му ляличIинува итталун агьлай ия. Мукуна ккавккуна Ворошиловгу. Му ппурттуву агьамсса аьрххилий Украиннайн лавгсса билаятрал бакIчи Хрущев личIаннин, залдануву билаятрал лагрулийсса циняв хъуни къуллугъчитал бия. Га аьрххилий жун ялагу хъинну асар хьуна немецнал аьс бувсса партизанка Зоя Космодемьянскаял ниттищалсса хьунабакьавугу, – гъирарай дакIнийн дутлай бур та чIун Тарият.
Москавлив Декадалийнсса Дагъусттаннал делегациялул аьрххилия видео-журнал бувну, МахIачкъалаллал кинотеатрдаву, фильм дайдишин хьхьичI, му ккаккан бувайсса бивкIун бур.
Му аьрххилий Тариятлущал ниттил нинугу диркIун дур, мунил душ ккаккан бувну бур Пермь шагьрулул паччахIлугърал хореографиялул училищалул преподавательница Мэй Варвара Павловнан. Мунил, чIава къавтIалал бюхъу-гьунаргу ххал бувну, муний дакI даркьуну, уттигу чIивир, ца-кIира шинавун цачIава дуклан буцинну куну бур. Ца шинавун тIурча, бугу-бувцуну бур.
Билаятрай сий думи дуккаврил идарарттавасса Пермскаллал хореографиялул училищалуву дуклан Дагъусттаннаясса душ лагаву га чIумал хъунмасса иширан ккаллину бивкIун бур.
Пермь шагьрулий дуклакисса мяйрагу шинал лахъишиврий Тариятлул цагу-кIирагу хьуну дакъар машгьурсса инсантуращалсса хьунабакьаву: МахIмуд Эсамбаевлущал, Валерий Ободзинскийщал, гастроллай бучIайсса бивкIсса цайми-цаймигу цIанихсса инсантуращал.
Цуксса хIайпнугу, дуккавугу къуртал дурну, 1969 шинал ванил диплом канил бугьаннин, мудангу ванил оьрмулул ххуллул чанину диркIсса ниттил нину аьпалул хьуну дур. Тариятлул ца яла яргми дакIнийн бичавурттугу дур ниттил ниттицIун дархIусса. Ва сагъну дуссаксса ванил ссахчIав мюхтажшингу къадиркIун дур. Ряхва оьрчI бусса кулпатрава, цилва душнинсса ва куявнансса кумагран кунма, цичIанма бувцуну, Тариятлулсса цилва буллай диркIун дур Муъминат.
Дуккаву къуртал дурну махъ Тарият зун тIайла бувккун бур Нальчикрайн, 3 шин дурну дур тикку ПаччахIлугърал музыкалул театрдануву балетрал артисткану. Ми шиннардий классикалул балетирттаву щаллу дурну дур сольный партиярттугу.
Нальчикрая Дагъусттаннайн зана хьуну, Тарият Культуралул ва искусствалул колледжраву зун бивкIун бур. Кулпатралгу хьуну, Къазахъисттаннайн лавгун, цаппара хIаллавун цIунилгу Дагъусттаннайн зана хьуну, личIи-личIисса кIанттурдай зий бивкIун бур. Цимигу шин дурну дур Республикалул оьрчIал искусствалул школалул директорнугу.
ХIакьинусса кьини Тарият зий бур «Лезгинка» ансамбльданул Школа-студиялул каялувчину, ДГУ-лул культуралул факультетрай ва Ссихьрал театрдануву.
Цилва, цилла кIулшивуртту авадан даврил ялув муданмагу бавцIусса Тариятлул, 1995-ку шинал бувххун, 2002-ку шинал къуртал бувну бур Санкт-Петербургуллал профсоюзирттал гуманитар институтрал искусствардал факультет (балетмейстер-педагогнал пиша). Мура шинал Вагановал цIанийсса Оьруснал балетрал академиялуву бувккуну бур квалификация ларай дайсса курсругу.
1997-ку шинал аьпалул хьуну ур ванил оьрмулул дус – личIлулсса лас ва ппу, Гъумучатусса Къапиев МахIаммад. Мунал хъаралу шинну дичин кьисмат шавугу хъунмасса бахттилун ккалли буллай бур ва.
Барчаллагьрай бур Тарият «Дараччи» клуб цилва оьрмулуву бивкIшиврухлу ва бушиврухлу, бусраврай дакIнийн дутлай бур, аьпа биву, Мариян Илиясовал цIа, зумух ласлай бур му клубрал хIакьинуми уртакьтурал цIардугу.
Тариятлул бур арс ва душ, оьрчIал оьрчIру.
Барча вил юбилей, аьзизсса Тарият! Битаннав ина уттигу чIярусса шиннардий винна ххирасса даврий, винма ххираминнал дянив!
