Январьданул 26-нний ДР-лул БакIчи Сергей Меликовлул журналистътуращалсса хьунабакьаврий дунни коронавирусрайн къаршисса Оператив штабрал батIавурттал хIасиллу.
Республикалул каялувчинал бувсунни батIавурттал лагрурдай ххал бигьлай бивкIшиву агьали коронавирусрал инфекциялул къашавай шаврил ва мунил хьхьичIалу кьукьинсса профилактикалул давурттацIун бавхIусса масъалартту.
«ХIакьину жува ххалбигьарду ванияр хьхьичIва оперштабрал ххал бигьин хьхьичIун лавсун бивкIсса масъалартту. Аьмну лавсун ттинин дурсса давурттал хIасиллу хъинчулийсса дур. Ноябрьдания шинмай къашавай хьусса инсантал ялу-ялун чан хъанахъисса тагьар чIалай дур. Ссуссукьушивурттал давурттаяту кумаг хьуну бур коронавирусрал инфекция чан-кьансса дунугу дацIан даврин. Махъсса кIира нюжмардий цIуну къашавай хьуми гьарца гьантлий чан хъанай бур», – кунни Сергей Меликовлул.
Дагъусттаннал каялувчинал Оперштабрал батIаврий бувсунни хIукму хьуну бушиву ттинияр тихуннайгу дуруччин цинярда ссуссукьушивуртту. Агарда уттигу кIира нюжмардува хъин чулийсса дахханашивуртту яхьуну личIарча миннувасса цаппара дукьан дуллай байбишин бучIиссар.
