Гьашину МахIачкъалалив «Формирование комфортной городской среды» ва «Жилье и городская среда» тIисса федерал программардал лагрулий дакьин дантIиссар лахъ къатрал хьхьичIсса 25 хIаят. Вай давурттан итабавкьуну бур 262,5 млн арцул. ХIасил, Лениннул райондалий дакьин дан ккаккан дурну дур 11 хIаят, Кировскаллал райондалий – 8 ва Советский райондалий – 6 хIаят. Шиккува дакIнийн бутан, хъуншагьрулий лахъ къатрал хьхьичIсса хIаятру дакьин дуллалисса давуртту най ду­ссар 2017 шиная шиннай. Ттининнин дакьин дурссагу, утти вания гихуннай дакьин данссагу хIаятру язи дугьайссар гикку яхъанахъи­сса агьалинащал хьунагубавкьуну, гайннан цала хIаятраву ци дурну ччиссаривгу кIул бувну махъ. Цаннащал ца маслихIатругу ккавккун, ца тIимунийн бучIайхту, усттартал зий байбишин хьхьичI шагьрулул администрациялул дурну схема, цинявннан чIалансса кIанай лахъайссар. Вай давурттал лагрулий бакьин бан ккаккан бувну бур оьрчIру тIуркIу тIунсса ва спортрал оборудование дирхьусса майданну, чани бишин, агьлу бахьтта занансса ва хIаятирттавунсса машинарттал ххуллурду бакьин бан, мурхьру, тIутIив дугьан, халкь щябикIансса скамейкарду бишин ва урнарду дишин.