Ххуллурдай чIявусса бала-апатIру хъанай бур, мугъаятну бикIияра, ххуллийн бувкминнал дуруччияра ххуллул низам тIий, леххаву тIийнма бур республикалул Госавтоинспекция.

Ва шин дайдирхьуния шиннай ххуллурдайсса тагьар хъинну захIматсса дур. Дагъусттаннал Госавтоинспекциялул зузалт хъунмасса хIарачат буллай бур гьарица ххуллийн увксса инсан, – щупир икIу, ахьттачу икIу, пассажир икIу, хаснува мюрщри оьрчIру, бала-апатIрая мюхчан бан. Амма инсантурал цала баччибакъашиву дуллалийни жул захIматгу ссайнкIуй буклай бакъар, – тIий ур Дагъусттаннал ГИБДД-лул хъунама Александр Шалагин. Ванал бусласимунийн бувну, так ца январь зурул дянив Дагъусттаннай 115 ДТП хьуну дур. Миннуву 157 инсаннайн щавурду дирну дур. Щавурду дирминнава 15 инсан оьрмулул 16 шинавун ияннинсса ур. ОьрмулуцIа хьуну ур 26 инсан. Ларгсса шинал вара чIумуву 17 инсан оьрмулуцIа хьуну ивкIун ур. А. Шалагиннул дакIнийн дуртунни 4 жагьилсса инсан оьрмулуцIа хьусса авария. Вай цаягу мюхчан байсса мухIулттив дархIуну бивкIун бакъар.
Госавтоинспекциялул хъунаманал оьвчаву дунни цинявппагу дагъусттанлувтурайн, укунсса бала-апатIру къахъананшиврул, ххуллул низам дуруччияра тIий.