Декабрьданул ахирданий Дагъусттаннал Жагьилтурал министерствалул къатраву хьунни пандемиялул чIумал хъуннасса чирилул даву дуллай бивкIсса «ЦачIу бюхъантIиссар» тIисса лакрал жагьилтурал фондрал вакилтуран бахшишру дуллалисса мажлис.
Давуд Амировлул каялувшиннаралусса ва фондрал пандемиялул чIумал дурсса ххаллилсса давурттая жу кказитрайгу буслай бивкIру.
Март зуруя байбивхьуну, шин къуртал хьуннин фондрал бувссар цимивагу чирилул акция.
Ларгсса шиналсса давуртту къуртал дурссия нину-ппу бакъасса, мушакъатсса ва ахIвал кIюласса кулпатирттавасса оьрчIайх цIушинал бахшишру, нацIу-кьацIулул кьуцуртту бачIаврийну.
«Жува цачIу буссару» цIанилусса Щалагу Аьрасатнал проектравух хIала бувххун, лакрал жагьилтурал дурсса даврин лайкьсса кьимат бивщунни хIукуматралгу.
Ва кьини волонтертал ЦIусса шинал байрандалущалгу барча бувну, миннахь барчаллагь тIисса ихтилат бунни жагьилтурал иширтталсса байсса министр Камил Саидовлул ва мунал хъиривчу ПатIимат Оьмаровал.
— Жула халкьуннайх кьини дурксса чIумал зу дурсса даврин багьа бищун къашайссар. Зу ккаккан дунни зунттал агьулданул яхI-къирият, узданшиву, чумартшиву. Зула оьрмурдан ва цIуллу-сагъшиврун нигьачIаву дусса тагьарданий зу кумаг буллай бияв захIматшиврухун багьсса инсантуран. Бугьарасса, кьатIув буккан къахъанай ливчIсса инсантурачIан шаппа-шаппай занай, диян дуллай бияв дука-хIачIанмур, даруртту. Та ппурттуву зу тирх учин дунни нигь-ццах дагьсса инсантурал дакIру. Умуд бур жува уттиния тихунмайгу цаннан ца бувчIлай, хIала-гьурттуну зунссару тIисса, – увкунни Камил Саидовлул. Ванал буллунни чирилул давурттаву чялишну гьуртту хьусса волонтертуран Дагъусттаннал БакIчи Сергей Меликовлул чулухасса Барчаллагьрал чагъарду.
Волонтертурал цIания Давуд Амировлул барчаллагь увкунни министрнахь гьарица цала дуллалисса давурттал чIарав ацIлай ивкIун тIий.
