Дагъусттаннал БакIчинал буржру чIумуйну биттур буллалисса Сергей Меликовлул хIукмулийн бувну, республикалий ялун нанисса шин баян бунни ДАССР-данул 100 шинал юбилейрал шинну.
МуницIун бавхIуну, республикалий, районнай чялишну дуллантIий бур Дагъусттаннал автономиялул тарихрацIун дархIусса личIи-личIисса мероприятияртту.
Вай гьантрай ЦIуссалакрал райондалий ЦIуссалакрал шяравусса майданнив лархъунни ДАССР-данул юбилейран хас дурсса 20 метра лахъишиврийсса ва 10 метра утташиврийсса баннер.
Баннерданий чивчуну бур Аьрасатнал Президент Владимир Путиннул махъру: «Ттун Дагъусттан ва Дагъусттаннал агьали хъиннува ххира хьунни, миннал цала Ватан дуручлачисса куц ккавккун махъ» тIисса. Баннерданий мукунна дур райондалул оьрмулувасса ва республикалул цIа-кьини бюхттул дурсса инсантурал суратру.
ЦIуссалакрал райондалийсса школарттай ва личIи-личIисса идарарттай кIицI ларгунни му таварихран хас дурсса мероприятияртту, тIиртIу дарсру.
