Январьданул 12-нний МахIачкъалалив ВКС-рал низамрай хьунни Дагъусттаннай коронавирусрал инфекциялул хьхьичIалу кьукьаврил Оператив штабрал батIаву.
Республикалул каялувчи Сергей Меликовлул бусаврийну, байрандалул гьантрай цIуллушиву дуруччаврил система даччин дакъа зий диркIун дур. Ми гьантрай къашайшалт гьарза хьуну бакъар, чангума хьуну бур.
ДР-лул ХIукуматрал Председательнал хъиривчу Анатолий Карибовлул бувсунни ми гьантрай азарханардай бачIвасса койкарду бивкIшиву 25-30%.
ЦIуллу-сагъшиву дуруччаврил министр Татьяна Беляевал бувсунни коронавирусрал инфекциялул къашайшалт хъин буллалаврил иширттая. Мунил тIимунийну, луртандалий бусса бур 35 млн къурушрансса 25 журалул даруртту, мукунма федерал центрдания кумагран лавсун бур 3,5 млн къурушрансса даруртту. Декабрьданий духтуртуран социал выплатартту дурну дур 320 млн къурушрансса. Миннул хIакъираву аьрзарду букIлай бакъасса бур.
ЦIанасса ппурттуву азарханардаву дузал бувну бур 3937 койка. Коронавирусрал цIуцIаву хъин дуллай ур 5297 медициналул зузала, миннавату 2013 ур хIакин. 1605 къашайшала шава хъин хъанай ур.
Республикалийсса санитар-эпидемиологиялул тагьардания бувсунни Роспотребнадзорданул управлениялул каялувчи Николай Павловлул. Мунал тIимунийну, ларгсса 3 нюжмардий коронавирусрал къашавайшиву цалий дарцIуну дур. Циняв коронавирусрал къашайшалтравату 63,8% тасттикь хьуну дур пневмония, 23% азар дусса дур цIуцIаврил лишанну дакъа, 13%- ОРВИ-лул журалий.
БатIаврий ихтилат бунни мукунма ДР-лул спортрал министр МахIаммад МахIаммадовлул.
