Лакрал райондалул школарттай хьунни Ленинград щаллуну душманнал блокадалуща итххяххан баврин хас бувсса щалагу Аьрасатнал акция, «Блокадный хлеб» тIисса.

Акциялул лагрулий школарттай дирхьунни сайки кIира ва дачIи шинал лажиндарай душманнал вив лавсун бивкIсса Ленинград шагьрулул агьулданул чумартшиврия, кьянкьашиврия, ватан ххирашиврия бусласисса дарсру. «Блокадный хлеб» акциялул лишанну хьуну бур шагьрулул агьулданун яла захIматсса ппурттуву бакIран 125 грамм хIисаврай буллай бивкIсса ччатI. Ленинградуллал блокада лахъи ларгун дур 872 гьантлий, 1941 шинал сентябрь зурул 8-нний дайдирхьуну, 1944 шинал январь зурул 27-ннийн дияннин.

Акциялул лагрулий Щардал школалий дирхьусса дарсирай райондалул Жагьилтурал политикалул, спортрал центрданул директорнал хъиривчу Малик ХIусмановлул ва шяраваллил администрациялул бакIчи Мирослав Ибрагьимовлул бувсунни шагьрулул тарихраву яла оьсса кьинирду лайкьну дурхIусса Ленинградуллал агьулданул ссавурдания ва чумартшиврия.
Ккаккан дунни «Блокада Ленинграда глазами детей» тIисса видеоролик. Дуклаки оьрчIал бувккунни Ленинградуллал блокадалун хас бувсса шеърирдугу.