«Мурадирал елка» тIисса щалагу Аьрасатнал акциялул лагрулий Лакрал райондалул бакIчи, «Единая Россия» партиялул кIанттул отделениялул секретарь Юсуп МахIаммадовлул щаллу бунни Гъумучиял школалул 1-мур классрал дуклаки оьрчI Нуручиев Исламлул мурад, ванан велосипед ларсунни. Мобил телефон ларсун щаллу бунни Хьурттал школалул 9-мур классрал дуклаки душ Рамазанова Дианалмур мурадгу.
Акциялувух хIала увххун, ацIния кIира шинавусса Аркаллаева Магьижамал ххари бунни райондалул бакIчинал хъиривчу Абубакар Къюннуевлул, ванин цIусса телефон пишкаш дурну.
Шанма мурад биттур бунни Лакрал райондалул чулухасса ДР-лул Халкьуннал Мажлисрал депутат ЖахIпар Абуевлул. Ванал чулуха ШавкIуллал школалалул дуклаки душ Асадуллаева Асмаран ва Гъумучиял школалул дуклаки оьрчI Надиров Сяидлун телефонну пишкаш дурунни «Единая Россия» партиялул Лакрал райондалул отделениялул исполнительный секретарь Асият АьбдурахIмановал.
Каспийск шагьрулий ялапар хъанахъисса шанна шинавусса Шарапуттинов Сайпуллагьлун депутатнал ларсунни планшет.
Акциялувух гьуртту хьуну, оьрчIал мурадру щаллу бунни «Россельхозбанкрал» Лакрал райондалийсса отделениялул хъунама ХIусайн Куччаевлул, Культуралул управлениялул каялувчи Ансар Къажлаевлул, Гъумучиял оьрчIал магьирлугърал школалул директор МахIаммад Хъунбуттаевлул ва цаймигу идарарттал каялувчитурал.
«Ёлка желаний» бур «Единая Россия» партиялул щурущи бувсса «Мечтай со мной» тIисса ихIсандалул проектрал лагрулий 2017 шиная шинмай буллалисса акция.
