ХьхьичIвасса хъуншагьрулийгу хьунни юбилейрал мажлисру

ХьхьичIвасса хъуншагьрулийгу хьунни юбилейрал мажлисру

Вай гьантрай ДАССР-данул цалчин баян бувну бивкIсса хъуншагьру Буйнакскалий хьунни республикалун 100 шин шаврин хасъсса «Дагестанская государственность: истоки, становление, развитие» тIисса цIанилусса элмийсса конференция. Ва цурдагу най дия, дурусну 100 шинал хьхьичI РСФСР-данул миллатирттал иширттал нарком Иосиф Сталингу гьурттуну, Дагъусттаннал миллатирттал Цалчинсса чярхнийсса съезд хьуну диркIсса къатраву, цIанасса Буйнакскаллал тарихрал ва улча лахьхьаврил музейраву.

Конференциялул гьурттучитуравух ия ДР-лул Халкьуннал Мажлисрал председательнал хъиривчу СайгидахIмад АхIмадов, ДР-лул ХIукуматрал председательнал хъиривчу Анатолий Карибов, ДР-лул кIулшивурттал ва элмулул министр Уммупазил Оьма­рова, ДР-лул миллатирттал политикалул ва диндалул иширттал министр Энрик Муслимов, ДР-лул Халкьуннал Мажлисрал депутатътал, республикалул вузирдал каялувчитал, жяматийсса сакиншиннардил вакилтал ва журналистътал.
Шиккува дакIнийн бутан, ДАССР-данун 100 шин шаву жу­лла республикалий кIицI лаглай буссар Дагъусттаннал БакIчи Сергей Меликовлул цIакь бувсса хIукмулийну. Ва шин жулла республикалий хас дурнугу дуссар му таварихран.

Конференция тIитIлай, Сай­гидахIмад АхIмадовлул кIицI бунни ларгсса 100 шин Да­гъусттаннал агьалинал оьрмулуву нахIакьдансса къадиркIшиву ва республикалул вай шиннардил манзилданий бивтшиву авадансса, буллугъсса ва дагъусттанлувтурал хъуни-хъунисса захIматру бивхьусса ххуллу.
– Ттуршра шинал мутталий республикалий дурссар чIярусса хъунисса давуртту. ГьануцIакул ччаннай дацIан дурссар сайки циняр арарду, агьалинал багьу-бизу. Вания гихуннай данмургу вайннуяр чансса дакъассар. ЦIанагу Дагъусттаннай щурущисса агьамсса давуртту чан дакъа­ссар, – увкунни ванал.

Махъру мукунма лавхъунни Буйнакскаллал бакIчи Исламуттин Нургудаевлул, ДГУ-лул тарихрал факультетрал декан Башир Булатовлул, Дагъусттаннал тарихрал, археологиялул ва этнографиялул институтрал отделданул хъунмур Эльмира Далгатлул, Буйнакскаллал музейрал директор Минкаил Дугъричиловлул.

Яла конференциялул гьурттучитал лавгуна 1901 шинал хъами-душру дуклан тIивтIуну бивкIсса Буйнакскаллал гимназиялувун. Миккура шадлугърал тагьарданий кIа гимназиялун дирзунни Совет Союзрал Виричу Анатолий Хуторянскийл цIа. Ванал бюст бивхьуну буссар гимназиялул чIаравсса Буйнакскаллал паркраву.
Гимназиялун ва Виричунал цIа дуллуну дур шиву дуклакисса оьрчIал сипталийну. Микку махъ лавхъсса Анатолий Карибовлул кIицI лавгуна оьрчIан укунсса зат дакIнийн багьаврилгу тасттикь буллалишиву жула ялун нанисса ник Ватан ххирану, жула буттал буттахъал бувмунил кьадру-кьимат буну тарбия хъанай душиву.

Читайте также: