Щалагу республикалий лахъа-хъунну кIицI лаглай бур Дагъусттаннал автономия сакин хьуну 100 шин шаву. Ва иширацIун бавхIуну сайки цинявппа идарарттай хъанай дур личIи-личIисса мероприятияртту. Ххаллилсса шадлугърал мажлис хьунни вай гьантрай, царагу байран лях гьан къаритайсса, Хъювхъиял шяравусса Аьрасатнал халкьуннал аслийсса культуралул центрданийгу. Байрандалун лархьхьуну чIюлу дурну дия Центрданул къатри.
Лавхъун бия танийвасса ДАССР-нул ттугъ. Ккаккиялун дирхьуну дия жула буттахъал, буттал буттахъал ишла дуллай бивкIсса матахI.
Мероприятиялул сакиншинначитал – Центрданул каялувчи Рукьижат Оьмаева ва Хъювхъиял школалул учительница Сапият Кьурбанова цивппагу, дуклаки оьрчIругу бия Дагъусттаннал миллатирттал янналуву.
[dropcap]М[/dropcap]ажлис тIитIлай, ихтилат бувна Рукьижат Оьмаевал. Ванил бувсунни Дагъусттаннал автономия сакин дурну диркIшиву 1921 шинал январь зурул 21-нний ВЦИК-рал декретрайн бувну, вара шинал, декабрь зуруй, щалагу Дагъусттаннал Советирттал цалчинсса съездрай баян бувну бивкIшиву Республикалул Конституция.
Дуклаки оьрчIал дурккунни Дагъусттаннахасса назмурду, увкунни балайрду, ккаккан дунни Дагъусттаннал халкьуннал къавтIавуртту.
