ХIакинтурансса экзамен куннасса шин

Коронавирусрал ххал диргьунни жулла цIакьшивугу, хьхьарашивугу

Гьашинусса шин жула цIуллушиврул ялув бавцIусса хIакинтурал, медсестрахъал жяматрал хьхьичI экзамен дуллусса шин хьунни. Пасат дансса коронавирусрал ххал диргьунни жулла цIакьшивугу, хьхьарашивугу.

Уттигъанну на хьунаавкьура Ккуллал райондалул азарханалул хъунама хIакин Щамхалов КьурбанмахIаммад Гьаруннул арснащал ва булав ванахьхьун укунсса суаллу.


– КьурбанмахIаммад, гьашинусса шин хьунни зул профессионалшиву ххал дигьлагьисса куннасса шинну.
– Гьашину щалагу дунияллийх ппив хьуну нанисса кIул бакъа балаллул, гьай-гьай, жугу пикрирдавун бивчунав. НигьачIаву дусса инфекция ппив хьуну нанисса чIумал, жунгу багьуна хIадур хъанан. Жу къуццу тIун бивкIру ДР-лул БакIчинал хIукмулул, Аьрасатнал ва Дагъусттаннал ЦIуллу-сагъшиву дуруччаврил министерствардал тIалавшиннардах вичIи дирхьуну.

КутIасса чIумул мутталий хIадур бувссия 34 тах, 10 хIакин, 20 медсестра,16 санитарка. Миннал лавхьхьуссар къашайшалт кьамул бан, хъин буллан аьркинсса куц, бувккуссар къашайшалтращал зунсса хIакинтурал ва медсестрахъал курсру. Ми най бия дистанциондалул манзилданий интернетраву. Интнил дайдихьулий паракьатшиву дуну жучIара, бювхъуна ххуйну хIадур хьун, азархана аьркинмунил щаллу бан.

Майрал дайдихьулий бавчуна ца мугьали къашайшалтрал. БукIлан бивкIуна пневмониялуха къалархьхьусса, коронавирусрал лишанну дусса захIматсса къашайшалт. Коронавирусрал инфекциялийн щак тIими къашайшалтрал диагноз мяйжан дан гьан дуллай бивкIру республикалул лабораториярттайн. Анализирттал хIасиллах бурувгун, хъин буллай бивкIру.

– Инсантал чансса жулла райондалийнгу цукун дуркIссар му цIуцIаву?
– Бия, мяйжаннугу, хьунабакьлай, ччарча жагьилми, ччарчан бугьарами, вих бакъа, жува хъяврин буллалиссару, дакъассар цукунчIавсса пандемия тIиссагума. Махъ, цала кулпатирттаву, гъан-маччанал дянив къашайшалт бачайхту, чансса паракьат хьуна мукунмигу. Амма цуксса бусларчангу, бувчIин булларчангу агьалинан, ци ишрив къакIулли, вих бан бюхълай бакъая.
– Чув, цукун хъин буллай бивкIру коронавирусрал цIуцIаву дирми?
– Жу хIадур бувссия инфекционный отделениялий коронавирусрал ва пневмониялул къашайшалт уттубишин бансса ва хъин буллансса госпиталь. Къашайшалт гьарза хъанай, кIантту биял къахъанан бикIайхту, Дагъусттаннал ЦIуллу-сагъшиву дуруччаврил министерствалул ихтияр дуллуна 20 тах терапиялул, 8 тах оьрчIал отделениялий ишла буллан. Ги­ккугу аьркинсса шартIру щаллу дурссия. Зий буссия хIакинтал, медсестрахъул, санитаркахъул «ятIулмур зоналий» 6 ссятрай, «щюллимур зоналий» –18 ссятрай, бигьалаглай бивкIссар къатIув къабувккунма. Хъунма­сса захIмат буллай буссия щархъайсса ФАП-ру, Ккуллал шяраваллил участокрал азархана, Вихьуллал шяраваллил амбулатория, азарханалучIасса «анаварсса кумаграл» зузалт. Ца бигьашиву му дия, ва азар оьрчIайн чанну ва бигьану дияву.

– Цими къашайшала хъин увну итаакьарду зу?
– Жул азарханалий хъин хъанай уссия 258 къашайшала пневмониялул ва коронавирусрал. Вайннава 128 ия коронавирусрал къашай хьусса. ЗахIматну къашай хьусса 11 къашайшала тIайла увкссия республикалул азарханардайн.

– Хьурив жучIава къашайшала ахиратрал хьусса иш?
– ЗахIматну къашавайсса ца къашайшала увкIсса кьинива къуртал хьуна. Шава хъин хъанай, чIумуй хIакинтурайн ув­ккун акъая.

– Зул захIматран бивщурив кьимат?
– Дагъусттаннал ЦIуллу-сагъшиву дуруччаврил министерствалул, Дагъусттаннал ХIукуматрал чулуха ва цIуцIаву хъин дуллай ялув бавцIуну бивкIминнан дуллунни грамотартту, барчаллагьрал чагъарду. Ца хIакиннан, Абакаров Камиллун, дуллунни «Дагъусттаннал лайкь хьусса хIакин» тIисса цIа.

– Бурив хIакьинугу азарханалий му цIуцIаврил хъин хъанахъисса къашайшалт?
– ХIакьинусса кьинигу жучIа му азар хъин дуллали­сса 7 къашайшала ур. Вайннаву захIматсса акъар.

– Хьурив ялун дир­сса оькьинилул чIарав бавцIансса инсантал?
– На цакьнивасса ихтилатравугу кIицI дурссия чIярусса райондалиясса ка-кумаг бувминнал цIарду. Цинявннахь барчаллагь тIий ура.

– Ялагу ци бусан хьун­ссар?
– Гьашину жу даврийн кьамул уварду шама хIакин: анестезиолог-реаниматолог, инфекционист. Ми бувкIссар жучIан «Земский доктор» тIисса программалийн бувну. Ялагу зун увкIунни кардиолог- аритмолог. БувкIунни азарханалул зузалтрал кабинетру щаллу бувансса компьютерду, дуркIунни маммограф.
На дакIнийхтунусса хъунма­сса барчаллагь тIий ура жяматрал цIуллу-сагъшиврул ялув бавцIусса зузалтрахь, райондалул хъунаманахь Шамил Рамазановлухь. Вайннал кумаграйну, зат бувчIаврийну бювхъунни жуща ттининсса ятIапирттава лажин кIялану личин.

Инфекция ппив хъанайнна дур. Паракьат хьун къабучIир медиктурангу. Амма жула агьалинангу аьркинни бурувччуну бикIан ва оьсса балаллуща. БувчIин аьркинни гьарцаннан, тIалавшиннардугу бартдигьлай, азарданул лишанну хавар шайхту, хIакинтурайн буклан аьркиншиву.
Ихтилатрал ахирданий ттун барча дуван ччива жяматрахь ялун нанисса ЦIусса шин. Яраппий, зун тIайлабацIуртту чан къабаннав, цIуллушиву дулуннав, дакIниймур бартлаганнав!

Ихтилат бувссар
ХIажимурад ХIусайновлул