Дагъусттаннал автономия баян бувну 100 шин шаврин хасну ва январь зурул 21-ннийсса тотальний диктантрацIун бав­хIуну, Ккурккуллал школалий хьунни «Буттал улча — Дагъус­ттан» цIанилусса шадлугърал мероприятие.

Байрандалун лавхьхьуну чIюлу бувну бия классрал къатта. ЧIирайн лархъун дия Саэд Габиевлул ва Гьарун Саэдовлул суратру. Дурну дия революциялул иширттаясса луттирдал выставка. Ккаккиялун дирхьуну дия нукIузаманнул матахI ва Дагъусттаннал халкьуннал сянатру ккаккан дуллалисса кьай-кьуй.

ОьрчIругу, учительталгу бия миллатирттал янналуву.
Мероприятие сакин дурну дия оьрус мазрал ва лакку мазрал учительница Гульнара Магьдиевал.

Мероприятие тIитIлай, ванил бувсунни Дагъусттаннал автономия сакин даврия, вай иширттал бакIщаращуй ивкIсса революционер, чичу, паччахIлугърал ишккакку ХIавинахъал Саэдлуя. Дуклаки оьрчIал бувккунни шеърирду, увкунни балайрду, кка­ккан дунни къавтIавуртту.