«Цукунсса бур вил дакIний цIусса 2021-ку шинаву щаллу хьуну ччисса мурадру?» – тIисса суал буллуссия на Ккуллал райондалул цаппара идарарттал зузалтрахьхьун. Вайннал дуллуна укунсса жавабру.

Ибрагьимова Марина,
Ккуллал райондалул магьирлугърал управлениялул каялувчи:
– Жуятура нанисса шин дия щаллагу аьрщарайсса инсантуран вас-ццах бутлатисса. На чIа тIий бура инсантурал дакIурдива буруккинтту духсса шинащал лагаву. ЦIусса шинаву чIа тIий бура райондалул агьалинан хьхьичIра-хьхьичI цIуллушиву, цума-цанналгу дакIнийсса мурадру бартлагаву, ужагърай буллугъшиву, ххаришиву.

ХIажиаьлиева ПатIимат,
Райондалул библиотекарттал хъунмур:
– ДакIнийхтуну барча тIий бура райондалул агьалинахь цIусса шин, чIа тIий бура цIуллушиву, дакIнийсса мурадру бартлагаву. Нава библиотекалул системалул даврий зий бухьувкун, чIа тIий бура цинявннан луттирдал, журналлал дустал хьун. Луттирду чIявуну ккалаккинал дакI хъинбалардайн кIункIу тIун дикIайссар, дакIний чани ххи шайссар.

Илиясова Сабрина,
Ккуллал райондалул ЗАГС-рал отделданул каялувчи:
– ДакIнийхтуну барча дуллай бура жула агьалинахь цIусса шин. ЧIа тIий бура цума-цаннангу цIуллушиву. Гьарца жагьилсса кулпатраву ххи хьуну ччива дакIру ххари-шад дуллалисса мюрщулт. Зана хъанай ччива Лаккуйнмай шагьрурдая агьали.

Загьидиев Аьбдул,
Ккуллал райондалул Ветерантурал советрал председатель:
– ЧIа тIий ура цинявннан цIуллушиву, буллугъшиву. ЧIявусса захIматру бувсса ветерантуран чIа тIий ура наслулиясса тирхханну. Жагьилминнахьгу тавакъю бавияв, аякьа дувара бугьараминнах, минначIан чIявуну биллалияра, куну.

ХIабибуллаев Дауд,
2-мур ЦIувкIуллал школалул директор:
– Ччива цIусса шинаву жула 2-мур ЦIувкIуллал, ЦIущарнил шяраваллавунсса ххуллурду цIу буккан бувну. Школалийн ччива жагьилсса учительтал бучIансса чаранну лявкъуну, школалийсса ремонтрал давуртту къуртал дурну. ДакIнийхтуну чIа тIий ура цинявннан цIуллушиву, талихI, тирхханну. Духсса шинащал баласса инфекция жуятура арх хьуннав.
ЦIухху-бусу бувссар
Арсен Аьбдуллаевлул