Вай гьантрай жул редакциялийн оьвкунни Башкирнал хъуншагьру Уфалия арх бакъасса Ишимбайрай ялапар хъанахъисса КIундиннал шяраватусса Исупов Расул МахIаммадлул арснал. Шикку ва яхъанай усса ур 1980-ку шиннардия шинай. Ванал жучIан оьвчаврил мураднугу бия, миллатрал кказитрайхчIин ялун нанисса ЦIусса шингу барча дурну, Лакрал райондалул азарханалул зузалтрайн барчаллагь баян баву.
Вайнна Расуллул гьан дурсса цIарду: хъунама хIакин Ххутиятусса АьвдурахIин Дибиров, Гъумучатусса хIакин анестезиолог-реаниматолог Зарема НухIова, Ккурклиятусса хIакин-терапевт Рукьижат ХIажиева, Хъунатусса хIакин-терапевт Саният ХIасанова, «Анаварсса кумаграл» фельдшер Жарият Аьлишаева, «Анаварсса кумаграл» хIакин Сааьдат Аьлиханова ва Кьубиял шяраватусса фельдшер ПатIимат НякIучиева, медсестрану зузисса Кьубатусса РайхIанат Кьурбанова, медсестрану зузисса ХьурукIратусса Лория Апанниева, медсестрану зузисса Вихьлиятусса ПатIимат МахIаммадова, санитаркану зузисса ШавкIратусса Ххадижат МахIаммадова, санитаркану зузисса Хьуриятусса Забида ХIажиева, санитаркану зузисса КIувратусса Залихха ХIажиева ва цаймигу вайннал чIарах бавцIуми.
Расуллул бусаврийну, августрал байбихьулий ванан багьну бур нязанний ивкIусса ссил арснал жаназалущал Башкирнава Лаккуйн учIан. КIурукъатлий щяивкIссаксса гьантрай хIисав хьуну бур ванан цала ччан някI лавгун, бурухлай. Щарнил фельдшернал кумаграйну,«Анаварсса кумаграл» вертолетрай ва анавархъиндарай Гъумукун иян увну ур райондалул азарханалийн. ХIакинтурал ччясса мутталий ччан ххал бувну, лявкъуну бур куртIсса туннурдаву оьттул тромб хьуну. Бувну дарув-дарманнугу, багьайсса ургъил-аякьагу, цаппара хIаллава Расул цала ччаннай зана хьуну ур миналийн.
– Жулла райондалул азарханалийн агьаннин къакIулссия ттун Лаккуй кIукун ххуйсса шартIругу дусса, цалла давугу кIулсса хIакинтал, медициналул пишакартал зий бивкIшиву, – тIий ур Расул.
Тай гьантрай, азарханалул зузалт маскардаву буну, ванан цинявннал лажинтру ккарккун дакъар, амма гьарнал цахрагу, вайми чIаравсса къашайшалтрахгу дуллалисса къулагъасгу, ургъилгу чIалай хъинну бусраврай кIицI лаглай ур гьарцаннал цIарду.
