Вай гьантрай Дагъусттаннал муфтиятрал сипталийн бувну буллай бивкIсса «Исламравусса ас-намус» тIисса конкурсрал хIасиллу дунни. Шикку гьурттушинна дурссар Дагъусттаннал паччахIлугърал педагогикалул университетрал, Дагъусттаннал паччахIлугърал университетрал, Дагъусттаннал гуманитар институтрал, Гуманитар-педагогикалул колледжрал ва М.А. Жамаллул цIанийсса Да­гъусттаннал художествалул училищалул студентътурал. Конкурсрал жюрилуву бия политикалул элмурдал кандидат Ханжан Кьурбанов, тарихрал элмурдал кандидат ПатIимат Ибрагьимова, филологиялул элмурдал кандидат ГулмахIаммад ГулмахIаммадов ва «Ас-салам» кказитрал канондалул редактор Аьдил Ибрагьимов.

Цалчинмур кIану бувгьунни ДГИ-лул теологиялул факультетрал магистрант ГитинмухIаммад АмирхIамзаевлул, кIилчинмур кIану бувгьунни ДГИ-лул магистратуралул кIилчинмур курсрал студентка Зугьра ХIасанбаговал ва шамилчинмур кIану бувгьунни Гуманитар педагогикалул колледжрал кIилчинмур курсрал студентка Мариян ДинмахIаммадовал.
Дагъусттаннал муфтинал хъиривчу МахIаммад Майрановлул ва ДГИ-лул ректор МахIаммад ХIажидадаевлул хьхьичIунсса кIанттурду бувгьусса студентътуран дуллунни арцуйнусса бахшишру ва дипломру.