Спорт террорданийн къаршину

Щалагу Аьрасатнал спортрал декадалул лагрулий, каникуллал гьантрай Гъумук хьунни жагьилтурал дянивсса футболданул турнир. Му сакин дурну дия Райондалул Культуралул, жагьилтурал иширттал, спортрал, туризмалул центрданул каялувчинал хъиривчу Малик ХIусмановлул.

Гьуртту хьунни мяйра команда: ххюра Гъумучиял, вайми Щардал, ГьунчIукьатIрал ва Хьурттал шяраваллавасса. Гьуртту хъанахъиминнавух бия шагьрурдая бувкIсса чIявусса студентъталгу. Ххув хьунни Гъумучиял мизитрал команда. КIилчинмур кIану бувгьунни Гъумучиял спортрал ветерантурал командалул, шамилчинмур кIану – Гъумучиял школалул дуклаки оьрчIал командалул. Ххув хьусса ва хьхьичIунсса кIанттурду бувгьусса командарттан буллунни дипломру ва арцуйнусса бахшишру.