Коронавирусрал цIуцIаву сававну дукIусса шин хъунмурчIин, ссуссукьушиннардай ларгсса агьали ЦIусса шинал тяхъашивурттая махIрум къабаншиврул, Роспотребнадзорданул гьарца тIалавшиннардацIунгу бавкьуну, хьхьичIраминнуяр дакIний личIансса даражалий дунни ва базилух елкалул байран Лакрал райондалий.
Муний гьуртту хьунни райондалул бакIчи Юсуп МахIаммадов, идарарттал каялувчитал, шяраваллал администрациярттал бакIчитал, школарттал дуклаки оьрчIру.
Байрандалийн бавтIми барча буллай, Юсуп МахIаммадовлул бувсунни ларгсса шинал хIасиллая ва ялун нанисса шинал дан дакIнийсса давурттая.
– Райондалий хъанахъисса гьарцагу хьхьичIуннайшивурттаву, махъ бакъа, зул захIматралгу бутIа буссар. Шин жапасса дия, амма захIматшивурттал жува кувнначIан кув хъиннува гъан бунну. Жущава чIявусса буруккинтту цачIу щаллу бан бювхъунни. ДакI дарцIуну ура укунма бавкьуну цIусса шинал мурадругу жущава чулийн буккан бан бюхъантIишиврий, – увкунни Юсуп МахIаммадовлул.
Барча кунни агьалинахь, социал-экономикалул ккаккиярттайн бувну, республикалул зунттал районнал дянив Лакрал район кIилчинмур кIанттайн дуккаву. ЧIа увкунни цIуллушиву, гьарцаннал ужагъирттай барачатшиву, дунияллий паракьатшиву.
Муния махъ райондалул бакIчинал, ванал хъиривчутурал, идарарттал каялувчитурал «Мурадирал елка» тIисса щалагу Аьрасатнал акциялул лагрулий дурккунни оьрчIал мурадру чивчусса открыткартту.
Шадлугъру къуртал дунни Гъумучиял ОьрчIал магьирлугърал школалул концертрайну.
