ЦIуссалакрал райондалул бакIчи МахIаммадхIажи Айдиевлул, аьдатравун багьсса куццуй, гьарица шинал ахирданий, бахшишру дурну, барча бай дуккавриву ва школалул оьрмулуву хьхьичIунсса ккаккияртту хьун дурсса оьрчIру. ХьхьичIми шиннардий укунсса мажлисру тIайла буккайссия шадлугърал даражалий. Ва ххуллух, коронавирусрал пандемиялуцIун дархIусса тагьар хIасул шаврийн бувну, дуклаки оьрчIру барча буллалисса мажлис хьунни Роспотребнадзорданул ва хIакинтурал чулухасса тIалавшиннарду дуруччаврийн бувну. Мунийн бувну, чIявуми оьрчIру барча бунни манзилданул режимрай ва райондалул щархъавусса кIулшивуртту дулаврил идарарттайн бувкIун.
[dropcap]М[/dropcap]ахIаммадхIажи Айдиев ва Райондалул КIулшивуртту дулаврил управлениялул хъунмур Светлана Къудаева бивунни Чапаевкаллал 1-мур, ЦIуссалакрал 1-мур, Чараваллал, Ямансуллал, Банайюртуллал школарттайсса дуклаки оьрчIру барча бан. Мукунма, ва кьини бахшишру дурну, барча бунни республикалул спортрал соревнованиярттай хьхьичIунсса ккаккияртту хьун дурсса оьрчIругу.
Райондалул бакIчинал лавайсса кьимат бивщунни школарттай хьхьичIунну дуклакисса оьрчIан ва миннащал зузисса учительтурал захIматран.
– ДуркIунни так цала хIарачатрайну ва куртIсса кIулшивурттайну хьхьичIунсса ккаккияртту чIалачIи дан бюхъайсса чIунну. Зу, ялун нанисса ник – райондалулгу, республикалулгу ялун бучIантIимурду. Умуд бур гихунмайгу, бацIаву дакъа куртIсса кIулшивуртту ласлай, уттигу цикссагу хъунисса ххувшавуртту ласунсса хIарачат булланссару тIисса.
КIицI лаганну, МахIаммадхIажи Айдиевлул сипталийн бувну, ЦIуссалакрал райондалий хьхьичIунну дуклакисса оьрчIру барча буллалисса ххаллилсса аьдат 10-хъул шинал лажиндарай дачин дурну бушиву. Му бакъассагу, МахIаммадхIажи Айдиевлул райондалул дуклаки оьрчIан дуккаврихсса гъира-гьавас бутаву мурадрай дачин дурсса цIу-цIусса цаймигу цIушиннарду дур. Ванал хIарачатрайну, хьхьичIунсса хIасиллащал ВУЗ-ру къуртал бувсса цикссагу студентътал давурттал дузал бувссар.
Гьашинугу, ва нигьачIаву дусса тагьар хIасул хьусса ппурттуву, аьдатравун дагьсса куццуй, дуклаки оьрчIру барча буллалисса мероприятие дунни, школарттайн цувагу, КIулшивуртту дулаврил управлениялул хъунмургу лавгун.
