Жул ГьунчIукьатIрал шяраватусса СилахIуттиннул арс Аьбдуллаев Жабраиллун уттигъанну там хьунни ниттил увну 85 шин.
Жабраил увссар 1936-ку шинал ГьунчIукьатIув. Буттал шяраву 7 шинал школа бувккуну мукьах къуртал бувссар Гъумучиял дянивмур даражалул школа. 1960-ку шинал ванал къуртал бувссар Москавуллал щинал хозяйствалул инженертал шайсса институт. Муния махъ цала пишалий зий ивкIссар Къиргъизнаву, Гуржиянаву, Армяннаву, буровой мастерная айивхьуну, участокрал прорабнайн ияннин.
Дагъусттаннайн зана хьуну мукьах зий ивкIссар РСФСР-данул Минводхозрал управлениялий «Дагестанводстройрал» проект-сметалул группалул хъунаману.
1965 шинал, СССР-данул МинэнерголуцIунсса Главзагранэнерголул тIайла увккун, Жабраил гьуртту хьуссар Египетнаву Бюхттулсса Асуан плотина дуллалисса, хъинну агьамсса давривух. Зийгу ивкIссар тикку мукьра шинал мутталий хъунама технологну. Тиха кIура авну махъгу зий ивкIссар цаннияр ца хьхьичIунсса къуллугъирттай, давурттай.
ХIасил, СилахIуттиннул арс Аьбдуллаев Жабраиллул оьрмулул биография бур ххишала бакъа авадансса ва яргсса.
Ванан дуллуссар Аьрасатнал Федерациялул ва Дагъусттан Республикалул лайкь хьусса строительнал цIардугу. Гьарца зий ивкIсса кIанттайгу кьадиртун дур ххуйсса цIа, хIурматрай ивкIун ур архIал зузиминнал дянив.
Жула бусравсса шяравучунал хъуннасса юбилейгу барча дуллай, чIа тIий буру Жабраиллун чIярусса цIуллусса шинну, ххари-хъиншивуртту!
ГьунчIукьатIрал ккуран
