Гьарца шинал ПаччахIлугърал Кремлилул дворецраву шайсса щалагу Аьрасатнал цIушинал елка ва шинал, коронавирусрацIун дархIусса къулай дакъасса тагьар сававну, хьунтIиссар тамашачитал бакъа.
Мунихлуну, кIинттул каникуллал чIумал Кремлилул елкалул шадлугъ федерал каналлай шамийлла ккаккан дувантIиссар: «Карусель» каналданий 31-мур декабрьданий 18:00 ссятраву, 7-мур январьданий ссят 19:30 хьуну ва 13-мур январьданий ссят 17:00 хьуну.
Кремлилул елка гьашину уттинин къааьдатсся журалий бувантIишиву буслай бур Москавуллал федерациялул профсоюзрай (МФП).
– Кремлилувусса елка бакъасса ЦIушинал байран къадикIанссар. Москавуллал профсоюзирттал му хьхьичIва-хьхьичI бивхьуссар 1953-ку шинал ва муния шиннай му аьдат лиян къадурссар. ТIайлассар, гьашину му хьунтIиссар телевизион версиялул кьаралданий, «Карусель» телеканалданул ларсун, Москавуллал ПаччахIлугъ, АьФ-лул Президентнал иширтталсса бувайсса управлениялул ва ПаччахIлугърал Кремлилул дворецрал гьурттушиврийну. Телевизорданувух му ххал дуван бюхъантIиссар миллион инсантураща, — тIий ур МФП-лул председатель Михаил Антовцев.
