ДантIисса давурттал аьдад

ДАССР-данун 100 шин шаврин хасну

Ва нюжмардий ДР-лул КIулшивуртту дулаврил ва элмулул министерствалул кьамул дунни ДАССР -данул 100 шинал юбилейран хасну ва шинал мутталий жула республикалий кIицI лагантIисса мероприятиярттал сияхI. Вайннул гьурттучиталну бикIантIиссар, оьрчIал садикирттал тарбиячитурая тIайла хьуну, республикалул каялувчитурайн бияннинсса агьлу. Ва сияхIрал ца къярттану хьунтIиссар январьданул 14-нния 21-ннин республикалул школарттай «ДАССР сакин шаву» тIисса диктант чичаву.

Акция мукунна дувантIиссар колледжирттаву дуклакиминнал дянивгу. Диктант аьмну чичинтIиссар 500 азарунния ливчусса дуклаки оьрчIал ва студентътурал. Мукунма шагьрурдал ва щархъавусса кIулшивуртту дулай идарарттай сакин бувантIиссар тематикалул семинарду, конкурсру ва классрал ссятру. Вузирдаву ва колледжирттаву дувантIиссар личIи-личIисса экспозициярдал выставкарду ва Дагъусттаннал миллатирттал аьдат-эбадатру, культура ва багьу-бизу ккаккан буллалисса мастер-классру, конкурсру ва элмийсса батIавуртту. Ца яла яргну кIицI лагантIисса шадлугъну хьунтIиссар билаятрал цайми регионнай дакъа­сса, Республикалул краеведтурал ва следопытътурал телевизион кьюкьрал слёт.

Инттухуннай дуклаки оьр­чIансса «Авангард» тIисса аьралийтурал ва патриотътурал лагерьданий дувантIиссар кадетъталгу гьурттусса хъуннасса шадлугъ. Мукунна хIадур дувантIиссар «Умники и умницы Дагестана» тIисса дуклаки оьрчIансса гуманитар олимпиадалул телевизион передача.
Республикалул оьрчIал садикирттал тарбиялувтурал дянивгу сакин дувантIиссар «ЧIава гьунардучитурал ассамблея» тIисса фестиваль.
Юбилейрал шадлугъирттал гьурттучиталну бикIантIиссар жула учительталгу. Миннан сакин бувантIиссар семинарду, конференцияртту ва музейрдавусса хьунабакьавуртту. Масалдаран, майрай дувантIиссар чIявучин бусравну ивкIсса учитель, гьунар бусса педагог-тарихчи Булат ХIажиевлун хас дурсса литературалул ва музыкалул батIаву. Мунияр хьхьичI, апрель зуруй, «Шинал учитель» тIисса республикалул конкурсгу ДАССР-данун 100 шин хъанахъисса юбилейран хасну дувантIиссар.
Вай циняр давуртту дуван­тIиссар Роспотребнад­зор­данул кьамул дурсса са­нитар-эпидемиологиялул тIалавшиннардугу чара бакъа дурурччуну.

Читайте также: