Республикалий ДАССР хIасул дурну 100 шинал юбилейрал шадлугъру дуллалисса кьини на, Дагъусттаннал совет автономия цIакь дуван биялсса хIарачат був­сса инсан ХIавинахъал Саэдлул чичрурду дай столданухгу щябивкIун, цIухху-бусурдай бивкIра му столгу, муницIун, столданий дишай лампалуя тIайла хьуну, гьарзат хIурматрай ядур­сса инсаннал къушлий – лакрангу, къалакрангу ххуйну кIулсса художник Абакаров Абрек-Заурдул (МухIадлул) ужагърай. ЩябивкIра мукунма Сталин щяивкIун ивкIсса ккур­тта бивкIсса стулданийгу. Дагъус­ттаннал автономия баян буван 1920 шинал Сталин Дагъус­ттаннайн увкIсса чIумал, му ливккун ивкIун ур ХIавинахъал СаэдлучIа. Абреклул ппу ГьунчIукьатIатусса ур, нину Гъумучатусса ХIавинахъал Саэдлул агьулданиятусса дур. Саэдлул ссу Абрек-Заурдул ниттил Калиматлул нину хъанай бур.

Абрек-Заурдул ва ванал кулпат Муслиматлул ххуйсса хIала-гьурттушиву диркIун дур Саэдлул кулпат Евгения Михайловнащал, арс Жайраннущал ва мунал кулпатращал. ХIакьинусса кьинигу хIалашиву дур Чачаннаву­сса ХIавинахъал Саэдлул уссурваврал наслулущал. Миннащал хьунабакьинсса хIалу дирияйхту бусанну минная гьарза-гьартану. Цал­ссарив ттун дакIнийхтунусса барчаллагь учин ччива ХIавинахъал Саэдлул чичрурду дувай столгу, стулгу, столданий дишай лампагу аякьалий ядурсса ва ядуллали­сса Абрек-Заурдухь ва Муслиматлухь.

Ва стол бусса къатлувун буххайхту, буниялттунгу, лавгзаманнувун багьсса кунмасса асар бухлай бур. Итталу загьир хъанай дур Дагъусттаннал агьалинан чанна­сса оьрму дузал буван чялиш ув­ккун ивкIсса цIанихсса революционернал, паччахIлугърал иш­ккаккул, бюхъу-гьунар бусса каялувчинал, публицистнал, шаэрнал ХIавинахъал Саэдлул сурат. Учайхха ппухъруннал энергетика миннал кьай-кьуйлиятугу дирзун дачайссар куну. Ттулгу, Абрек-Заурдул кабинетрава буккайни, му энергетикалул ясир дурну, дакI тиккура лирчIнуккар.
Суратру Абрек-Заур Абакаровлул архиврава .