ДР-лул кIинтнил даэрдал аьрщарал аьмсса лагру дур 1579,2 азарда гектар, миннувату 1214,3 азарда гектар – кIилакин, зунттал бизантту – 364,9 азарда гектар, скотопрогондалул аьрщив – 148 азарда гектар. КIинтнил даэрдал аьрщив ишла дуллай бур 39 райондалуцIунсса 552 хозяйствалул. КIинтнил даэрдайн куч байссар 1,5 млн яттил,165 азарва бакI гъаттарал, ва 3,2 азарва балчан.
Гьашину кIинттул зунттавату кIинтнил даэрдайн куч бувантIий бур 1,3 млн бакI яттил, миннувату Кочубейллал зоналийн бучIан бан най бур 700 азарва бакI яттил ва 38 азарва – лухIи дуссаннул.
Октябрьданий гужсса марчру бишлай, гъараллугу къалачIлай, Нугъайнал ва Тарумовкаллал районнайсса кIинтнил даэрдай гьавалул ва тIабиаьтрал тагьар къаххуйсса хьуна. Мунийну аьрщарал луртаннан тамансса зарал биян бувну бия.
Дагъусттаннал мурадлувсса министерстварттал ва элмулуха зузисса идарарттал вакилтурал цачIусса комиссия тиккун лавгун, бивщуну бивкIссар тIабиаьтрал ухссавнил чулийсса районнал кIинтнил даэрдайн биян бувсса зараллансса кьимат. Му комиссиялул тасттикь бувну бур октябрьданий 2 нюжмардий бишлай бивкIсса мурчал дяххан дурну диркIшиву аьрщарал ялувсса яла оьргъамур, ххяххияртту шаймур къат (плодородный слой почвы). Мунийн бувну, цIанасса ппурттуву тикку ххяхлай дакъасса дур цукунчIавсса уртту, дургьумигу ххяхханшиврий умуд бакъар.
ЗахIматсса тагьарданий лирчIун дур 22 райондалул 123 хозяйство, тикку дакъар цукунчIавсса уртту. Ми хозяйстварттаву бур 214,4 азарва бакI яттил.
Къутаннайсса хъузалтрал ва ризкьичитурал пирмарду ва къатри къундалухьхьун ларгун дур, цаппара къатрал, ппаллал, пирмардал магъив леркьун дур, хаснура Сухокумскаллал райондалийсса Рутуллал, Казбекуллал, Ккуллал ва цаймигу районнал ризкьичитурал къутанну дучIину лирчIун дакъар, микку ризкьи ябуван бюхъаншивугу къакIулли.
ЦIанасса ппурттуву мукунсса тагьар хьунутIий, миккусса къутаннайн ятту куч буван ччай бакъар ризкьичитуран, миннал пикри бур цайми къутаннайн куч буван цалва ятту.
Му тагьаргу хIисавравун ларсун, жул пикрилий, аьркинни баян буван Тарумовкаллал ва Нугъайнал районнайсса кIинтнил къутаннай ляличIисса тагьар хьуну душиву, республикалул шяраваллил хозяйствалун хьусса зарал чан бансса чаранну лякъиншиврул.
КIинтнил къутаннал Республикалул управлениялул каялувчинал хъиривчу
Юсуп ХIасанов
