ЦIушинал ссупралух

Зулла ва зулва хъамаллурал цIуллу-сагъшиврун зарал биян къабуван, цIушинал ссупралийнсса дукрарду дувансса сурсатру ласияра хъирив лавну, ми ссая дурну дурив, щил дурну дурив ва ми дуккан дурсса чIун ххал дурну.

* * *
ЦIушинал ссупра чIяву калорияртту бусса дукрардал авадансса бикIай. Зулла организмалийн гуж къабагьаншиврул цIушинал ссупралух зат чан-чанну, тарину дукияра.
Дукрардавугу, диетологтурал дурсса хъиривлаявурттайн бувну, хъинссар цал салатру дуркуну, яла кIилчинми ва хьюмуми дукрарду дуркуну.

* * *
Лапра чанну хIачIияра ягу дурагу махIачIару газ бусса щин, лякьагу лахъан дуллали­сса, цукунчIавсса мюнпатгу бакъасса.

* * *
Ссупралий, цайми дукрардунияр, ххину дитияра ахънилссаннул салатру, ахъулсса, уртту.

* * *
Диетологтал маслихIат буллай бур цIушинал ссупралух ккашилну щякъабикIаван.

* * *
ЦIушинал хьхьуну, шарда дикIу, хъамалу дикIу, ссупралий дуцири дукрарду ххал дуван­сса хIарачат мабулларду. ЛичIи-личIисса, дахха-дахханасса дук­рарду чIяруссаксса, организмалийнсса гуж-къиягу ххи хъанахъиссар.

* * *
Ссупралийн нанисса ахъул­сса, ахънилсса хъинну ххуйну шюшара, ахирданий ми щаралархъсса дюхлулсса щинай вигуларгун.

* * *
ЦIушинал байрандалия махъ холодильникраву хъунма хIаллай маябулларду кремращалсса тортру ва пироженайрду. ДикIущалсса дукра тIурча, кIилчин щаращи къадурна мадукаванну.

* * *
ЦIушинал щалла хьхьу, столданух щябивкIун, канай-хIачIлай, телевизор ххал буллай гьан мадувари. Буккияра кьатIувгу марцIсса гьава бюкьан, къуццу буван.

ОьрчIансса цIушинал бахшиширттая

ОьрчIан, оьрчIал оьрчIан «хъиншиву» дуван, ми ххари буван тIий, анавар мабуккару ттучанная миннан хIадурнасса нацIу бахшишрал кьуцуртту ласун, цивгу, хъунмурчIин, цIуллу-сагъшиврун заралсса ва лахъи ларгсса нацIу-кьацIурттал був­цIусса. Ва кIану хаснува арамтурайнни багьайсса.

* * *
Диетологтурал бусласимунийн бувну, нацIушивурттал хьхьара дуллалиссар оьрчIал иммунитет, цIушинал байрандалия махъ чIявуми оьрчIру мунийн бувнугу къашавай шай­сса бур. Миннал тIимунийн бувну, оьрчIансса бахшиширттаву кканпIитIру дурагу дикIан къааьркинссар, цавугу, маргарин тIий, кондитер аьгъушивуртту тIий, заралсса дакъа, мюнпатсса зат дакъасса.

* * *
Супермаркетирттава хIа­дурнасса бахшиш къаласлай, оьрчIансса цIушинал бахшишрансса кьуцуру зува буцIияра, оьрчIан мюнпат бумур ххал дурну, нахIушивуртту зура ларсун, зулла карунних дурну.

* * *
Зунна дикIу, оьрчIан дикIу, ласияра чаннасса рангирдал мармелад (красителлу чансса), пастила, чаннасса зефир, ххишивуртту дакъасса, мунищала какао диялну дусса щикIалат, ахънилсса, кьакьан дурсса ахънилсса (сухофрукты).

* * *
ОьрчIан ца ссятрай качарданул 10 граммраяр ххишалану къабучIину дур. Ца кканпIитIраву тIурча, качарданул 9 грамм дусса дур чанна-чанну. Ца кканпIитI дукаврийну цума оьрчIалли гьашиву дувайсса!?
Агарда хъамаллурал ларсун бучIарча нацIу бахшишру, щябивкIун, оьрчIащал архIал личIи дувара хъиннура заралми ва цахъи заралми, оьрчIангу нахIуну бувчIин бувну, хьхьичIа дукьара лапра заралмур.