Ттизаманнул вирттаврансса гьайкал

Декабрь зурул 24-нний, цакуну хъунмарххала бувсса дяркъу­сса кьини, МахIачкъалалив, Дагъусттаннал паччахIлугърал медициналул университетрал биологиялул корпусрал хIаятраву, тIиртIунни жулла дакIругу цалархIал пашмангу, гъилигу лаган дуллалисса гьайкал – коронавирусращалсса талатавриву ливтIусса медициналул зузалтрансса.

Гьайкал тIитIавриву гьур­тту хьунни Дагъусттаннал чIумуйнусса БакIчи Сергей Меликовгу.
– Ттун ттунма ккавккунни медициналул зузалт цукун аякьалий ва чувшиврий зий буссарив, коронавирусрал азарданухьхьун биривми ччаннай бацIан буван, вай хIакьинугу дакIнийхтуну цалва буржру биттур буллай бур, оьрмурдан нигьачIинна дунугу. ЦIусса шинал байрангу гъан хъанай дур, гьарми ва байрангу дуллантIиссар, шайнал шайсса куццуй, так респиратордавуми ва кIяла хялатирттавуми цала-цала давурттай зийри бикIантIисса, жучIава вайннал хIурмат бикIан аьркинссар, ливтIуцири хIакинтурал аьпагу хIурматрай ябуллантIиссару, – увкунни Меликовлул.
Гьайкал тIитIаврил мажлисрай гьуртту хьунни Халкьуннал Мажлисрал председатель Хизри Шихсаидов, Аьрасатнал Минздраврал Департаментрал хъунаманал хъиривчу Артём Тарасенко, вице- премьернал врио Анатолий Карибов, ДГМУ-рал ректор Сулайман Маммаев ва цаймигу бусравсса инсантал. Цалчинсса кIяла марххала бувсса кьини кIяла хялатир­ттавусса инсантурансса гьайкал тIитIавривугу духьунссар ссигъасса карамат. МарцI-кIяла ду­кканхьуви ва марххалттанущал дуниялгу баласса вирусирттая. Асар хьунни скульптуралул автор МахIаммад НурмахIаммадов цала гьалмахчувнащал гьайкалданул хьхьичIсса шачIанттай пахъ багьну щябивкIсса суратгу. МахIаммадлучIан барчаллагьрайсса махъру чивчуссия на, дакIнин хъинну асар хьун­сса даражалийсса скульптура магьирну дуваврихлу. Ящайхтура къюву чIалай дур, хIакинначIан гъан хьуну, мунайн хъямала багьан, ххира уван ччисса асар бур увкуссия. МахIаммадлул бувсунни скульптура дуллалини цалва мурадвагу, гьамин, мукунма­сса бивкIшиву. Утти ттуву скульп­туралий абад увсса хIакиннал чIарав щябикIан ччисса зувулул ялун ххи хьунни муначIа пашманну бакIру хьхьичIун дирчусса инсантурал чIаравгу щябикIан ччисса асар… Художникнал магьирсса каруннил караматри укунсса асарду жувува чантIа тIутIи буллалиссагу. ­