Уттигъанну райондалул школартту къуртал буллалиминнал экзаменну дулайсса Ккуллал шяраваллил 2-мур школалийсса пунктрай дуллунни информатикалул экзамен. Ва хъанай диркIссар цурдагу ххал бигьулул экзаменну. Му дулаврия ва сакин даврия бувсунни Ккуллал райондалул КIулшиву дулаврил управлениялул каялувчинал хъиривчу Оьмариев Жамалуттиннул.
– Цакьнира ЕГЭ дуллалисса дарсирдавух ва экзамен дакъассия. Утти, ялунчIил, техникалул зумувнусса касму язи дургьуну, вузирдавун бухлахиминная тIалав дуллантIий бур ва экзамен. Мунияту цал жура ххал дуварду жущарагу хьунтIий дурив ва экзамен дулун. Ва дулун ччиминнал компьютердануву задание тIитIиншиврул дикIан багьлай бия электрон зумувнусса кIула.
Мунийн «токен» учай. Му кIула дулайссар, жула пунктрая нанисса информация кьамул дурну, ххал дувайсса «Республиканский центр обработки информации» тIисса центрданул.
Экзамен дулунсса аьркиншин хьун дурссар управлениялул пишакар Амиров Артурдул, пунктрал каялувчи Чаринов МахIаммадлул ва миннавух нагу. Ва «пробный» экзамен дуллайгу уссия Ккуллал 2-мур школалул ца дуклаки оьрчI.
