Къашайшалтрансса ка-кумаг

Вай гьантрай АьФ-лул ПаччахIлугърал Думалул депутат Аьбдулмажид МахIрамовлул ДР-лул цIуллу-сагъшиву дуруччаврил министрнал хъиривчу Мазай Рамазановлущал ххал бивгьунни, республикалий пандемиялул тагьар хIасул шаврицIун бавхIуну, идарарттан медициналул кумаг баврил, даруртту ласаврил, арцуйнусса кабакьаврил хIакъиравусса масъалартту.


Депутатнал бувсунни коронавирусрал инфекциялул диагноз тасттикь хьусса, цала ичIува хъин хъанахъисса къашайшалтран Федерал центрданул бюджетрава дарурттахсса арцу итадакьлай бушиву.

Мазай Рамазановлул бувсунни цIанасса ппурттуву республикалун 115 млн арцул итабавкьуну бушиву коронавирусрал къашавайми хъин бувансса дарур­тту ласунсса.
Амбулаторияттай коронавирусрал инфекциялуцIун дархIусса азардая хъин хъанай бивкIсса къашайшалтран багьайсса уквасса препаратру лавсун букIлантIиссар волонтертал ва медициналул зузалт.

Укунсса къашайшалтран ккаккан бувсса даруртту гьан бантIиссар республикалул цинявппа муниципалитетирттайн ва ФАП-ирттайн. Шиккува бусан, республикалул агьали щаллу бантIиссар коронавирусрал инфекциялул къашавай хьуми хъин буллалисса схемалийн багьайсса цинявппа дарурттал. Азарханардай хъин хъанай бивкIсса къашайшалтран ва схемалийн багьайсса даруртту уква итабакьлай бивкIссар.