Ноябрьданул 25-нний батIул хьунни жуятува Диего Марадона. Аргентиннал бусалардавун агьсса футболист ивкIуну ур цакуну къюкI дарцIуну. Къуртал шайсса чIумал ивкIун ур цала шава. МуначIан бувкIун бивкIун бур анаварсса кумаграл цаппара машинартту, амма ххассал уван къавхьуну ур.
Октябрьданул 30-нний дунияллийх цIа дурксса футболистнал дурну диркIссар цува увсса кьинилун хасъсса шадлугъру, муния махъ, гара кьини, лавгун ур цалла футболданул командалул тIуркIулий тамаша буван. Амма тамаша буван къавхьуну бур мунаща, инжит хьуну, шавай зана хьуну ур. Ноябрьданул 3-нний Марадона уттуишин увну ур госпитальданий, ххал уван. Мунал бакIрал няраву оьттубацIу (гемотома) лявкъуну бур, мунал диркIун дур анемия, оьттул диялдакъашивугу.
Ноябрьданул 4-нний футболистнал няракъатлуй операция бувну, няравату тромб бувкьун бур. Ноябрьданул 11-нний га, хъин хьуссар тIий, шавай итаавкьуну ур.
