ЦIаххаева Ххадижат бувну бур 1973-ку шинал ЦIуссалакрал райондалийсса Чапаевкаллал шяраву.
Ххадижатлул хиял бивкIун бур лакку мазрал учитель хьун­сса. Ванин хъинну ххирасса бивкIун бур лакку мазрал учительница, ххаллилсса педагог АхIмадова СалихIат Халиллул душ. Ганил руртун дур Ххадижатлувун ниттил мазрахсса ччаву ва гьавас. Амма, иш цамур куццуй багьну, ва бувххун бур Тверь шагьрулий медициналул колледжравун.
Къуртал бувкун, зий бивкIун бур райондалул азарханалий.
Вай шиннардий цилла оьрмулуву хьунадаркьу­сса захI­матшивурттал биялалий чивчуну бур ванил цалчинсса шеъригу.
Ванияр махъ зий бивкIун бур МахIачкъалаллал 6-мур поликлиникалий. Шикку зий буна къуртал бувну бур Дагъусттаннал па­ччахIлугърал педагогикалул университетрал биологиялул ва химиялул факультет. Ххадижатлун хъинну ххирар Дагъусттаннал чичултрал творчество.
– Жул чIаххуврай ялапар хъанай буссия Хайдакьовхъал кулпат. Гайннал авадансса библиотека бия. Дусшиву дусса гайннал душнищал жу библиотекалува къабуккайссияв.

***
Бургила, арсрув, душрув,
Ххуйшиву жулва мазрал,
Кувннащал кув гъалгъа тIий,
Щалиххан къабюхъайсса.

Лакку мазрайри жува
Цалчинсса махъ увкусса,
МукъуцIун махъру бахIлай
Гъалгъа буллан лавхьхьусса.

Ниттил цила накIлищал
Жунма лахьхьин бувсса маз,
Бусиракьай, цукунни
Хъамабитан бюхъайсса!

На тамаша бувара
Ниттил маз къакIулминнай,
Оьрус мазрай гъалгъа тIий
ОьрчIру бяйкьин байминнай.

Ттул хъунмасса миннатри,
Ххирасса лакрал миллат,
Хъамабитан мабару
Зула оьрчIан ниттил маз!

***
Уттубивхьусса шаний
Шану къабиллан бикIай:
БакIравусса пикрирдал
Мугьали ялун бияй.

Аьратталсса асарду
ДакIнивун бувххун лагай,
ДакIнивату шеърирду,
Щин кунма, экьилагай.

На шаэргу бакъара
Усттарну шеъри чичлан,
Амма ца лакку душра
Лакку миллат ххирасса.

***
Замана, замана тIий,
Аьй заманалий дуллай,
Агьали кьюлтI бан ччай бур
Цивппа баххана шаву.

Цайминнал буллалисса
ХIарачат ва барачат
Цащава бан къахъанай,
Заманалийн бичлай бур.

Чансса бури ливчIуну
ДакIнил марцIшиву дусса,
Цайминнал хIарачатрай
Ххаришиву дуллайсса.

Ца ххуйну бикIанссия
Цала-цаласса барча,
Хъунзаннал буллу кьисмат
Гьарцаннан личIиссарча.

***
Циван увхссияв, ххирай,
ДакIнивун ваксса куртIну.
Циван кьаритав, ттул дус,
ДакIний хъин къашай щаву.

Ина дакIнивун увхни,
Ттул дакIний нур лархъуна,
Лахъайсса кунма ссавний,
ЦIай-цIай тIий, чанна цIуртти.

Лахъан бувна дакIниву
Лекъащай ччаврил лама,
Янин ххал къахьурчагу,
ДакI ччуччин дуллалисса.

Циван къума дав, ххирай,
Тахсир бакъасса ттул дакI.
Цан кьаритав ина ва,
Цивунна цурда аьтIий.

Цан къашавай хьун дував,
Бунагь бакъасса ттул дакI.
Бусикьай, дус, утти ттухь
Ва хъин дансса дармангу.

***
Ттисса балайчитурал
ТIабиаьт личIисса дур:
Балай учинсса гьунар
Фонограмма хьуну дур.

ЧчатI бан иникIма дишай
Гьарнал личIи-личIину:
Цавайннал шавхьусса ччатI
Парх бивкIсса, нахIусса шай.
Цавайнналгу, ччатI шахьлай,
ИникIма аьтIутIи дай.

Цавай балай тIутIийни
Чурх бассанну асар шай.
Цавайнналлив, балай тIий,
Макьаннал макьу лияй.