Ватандалул Вирттал дакIнин бивчунни

ЦIуссалакрал райондалийсса цинявппагу школардай хьунни Ватандалул Вирттаврал кьинилун хас дурсса мероприятияртту. Вай давурттаву хъуннасса гьурттушинна дунни райондалул Культуралул, жагьилтурал политикалул, спортрал ва туризмалул управлениялул зузалтрал. Вирттаврал кьинилуцIун бавхIуну, школардай дирхьунни къучагъшиврул дарсру, дунни классрал ссятру, дуклаки оьрчIал дирхьунни тIутIив Хъунмасса Буттал кIанттул цIанийсса дяъвилул къучагътурал гьайкалдануцI.


ТIутIив дирхьунни мукунна 1999 шинал сентябрь зуруй ЦIуссалакрал райондалий хьусса дяъвилул иширттаву жанну дуллуминнансса гьайкалдануцI. Цинярдагу мероприятиярттай оьрчIахь бувсунни Хъунмасса Буттал кIанттул цIанийсса дяъвилий цукунсса къучагъшивуртту дурссарив вайннал оьрмулувусса оьрчIал.
– Ватандалул Вирттаврал кьини – ва хъуннасса агьамшиву дусса, жула тарихрал къучагъсса лажинтру дакIнийн дичлачисса кьинир, – увкунни цила ихтилатраву КIулшивуртту дулаврил управлениялул хъунмур Светлана Кудаевал.