Гьашину, 2020-ку шинал, ххюра шинал хьхьичI Ккуллал райондалул цаппара шяраваллал бакIчиталну бувчIуну бивкIминнал чIун къуртал шаврийн бувну, хьунни цIусса бувчIавуртту. Шяраваллал бакIчитал хьун ччиминнал аьрзри цал ххал бивгьунни комиссиярттал. Яла ми комиссиярттал ккаккан бувминнахлу чIурду буллунни шяраваллал депутатътурал.
Вайнна цIуну бувчIусса шяраваллал бакIчитурал цIарду:
Къянив – ХIажимахIаммадов Малик МахIаммадлул арс,
ЦIущарнив – Мусаев Муси Самижуллагьлул арс,
Ваччав – МахIаммадов Арсен Кьадинал арс,
СунбатIлив – Бугъаев Рамазан Маликлул арс,
ЧIяв – Билалов МахIаммада Ярагъинал арс,
Вихьлив – Сулайманов СайкIу Сулайманнул арс,
Хъусрахь – Алларазуев Арсен Ширванинал арс,
2-мур ЦIувкIрав – Аьбдулкаримов Казбек Аьбдуллул арс.
ЧIяйннал, ЦIущарнил, 2-мур ЦIувкIуллал, СунбатIуллал, Хъусращиял шяраваллал бакIчиталну хьунни цIусса вакилтал. Вайми шяраваллаву цIунилгу бувчIунни ттинин бивкIми бакIчитал.
Жувагу чIа учинну вайннан дакIнийхтунусса тIайлабацIу. Умуд бур вайннал цалва къуллугъру жяматрал цIаний биттур булланссар тIисса. МуницIун Аллагьналгу кабакьиннав.
