Ноябрь зурул 25-нний МахIачкъалалив, Республикалул Миллатирттал политикалул ва динийсса иширтталсса буллалисса министерствалул сипталийну Дусшиврул Къатлуву «Дин ва СМИ» тIисса мероприятие хьунни. Тикку гьуртту хьунни паччахIлугърал органнал, жяматийсса ва динийсса идарарттал вакилтал, СМИ-лул зузалт. Агьаммур масъалагу диндалул тематика СМИ-лий аьч дуваврицIун бавхIусса бия.
Мероприятиялул дайдихьу дуллалисса ихтилатраву министр Энрик Муслимовлул кIицI лавгуна диндалул тема хъинну личIлулну, хъирив лавну аьч дувайсса тема душиву, чIяву миллатру ва динну дусса республикалий кувннащал кув бавкьуну, кувннал хIурмат кувнначIа буну бакъа къуццу тIун къабучIишиву. Хъирив ихтилат бувна Коми Республикалул национал политикалул министр Галина Габушевал. Ванил дакIнийн бувтуна вай гьантрай, Дагъусттаннай Коми Республикалул кьинирду най душиву, Дагъусттаннал аьдатру, культура цанна ххуй дирзшиву, жулва халкьгу хъамал ххирасса, аьчухсса бушиву, укунсса агьулданущал дусшиврул арарду цIакь даврия ххаринугу бушиву.
Дагъусттаннал Муфтиятрал медиахолдинграл вакил Наира МахIмудовал бувсуна диндалул тема аьч дуллалийни журналистурал давриву хIисав ласун багьлагьисса кIанттурдая, терминнал ялув бацIан багьлай бушиврия ва ми терминну тIайлану халкьуннангу дурчIин дуллан багьлай бушиврия. Масалдаран, «Шагьидтурал сквер» тIитIавриятусса информация буллалийни, чIявуссаннан «шагьид» тIисса мукъул мяъна тIайлану къадурчIлай, журналистътуран дурчIин дуллан багьлай бивкIшивриягу. Телеведущий, политолог Ханжан Кьурбановлул журналистътуран маслихIат бувна дин дуллалисса инсантуран асар хьунсса терминну «жигьад», «исламизм » ишла къадуллан.
Гьалбатта, докладру ва ихтилатру бия журналистътуран динналгу, миллатиртталгу дянивсса ара дурурччуну дикIан аьркиншиврия, багьайний багьайкун увкусса, чивчусса мукъул бияла хъунмасса бушиврия. Тиккура цIакь дуруна Коми Республикалул ва Дагъусттаннал Дусшиврул къатлул хIала-гьурттуну зунсса кьутIигу. Министр Энрик Муслимовлул цаппара диндалул ва миллатирттал дусшиврул темарду хьхьичIунну аьч дуллалисса журналистътуран дуллуна премияртту.
