Коронавирусрал инфекция цIакьну дурххун дур жулва оьрмулувун, му ччя-ччяни жулла ялату гьагу-къагьанссар. Ялун най дур кIи, му чIумалсса вирусрал къуццу тIутIаврия цалсса ххуйну кIулну бакъар. Амма, гриппрал вирусру кIинттул чIумал щирикIайхьувкун, коронавирусгу мукунна шайхьунссар тIисса пикри бур хIакинтурал.
Цалсса жува бан-битанмур так ца бур – жулва жува бурувччуну, жулва чурххахь коронавирусращал талансса гуж бикIаншиврул, жулла иммунитет цIакь даврил ялув цIакьну бацIан.
* * *
Дякъих, гъарал-марххалттаних къабурувгун, инсантал чIявуний вания тинмайгу маскардаву занан аьркинссар. Амма хъамамабитару ца маска кIира ссятраяр ххишала ларххун занан къабучIишиву.
* * *
Вирус инсаннал чурххавун чIярумур чIумал майравухчин дагьайхьувкун, хIакинтал маслихIат буллай бур май гьантлун цаппарассалилва вилагаван. Шикку ишла дуван бучIиссар физиологиялул раствор, пипеткалун кIанай инсулиновый шприцгу аьркин бувну.
* * *
ЦIанасса тагьарданий шаттирахун кару шюшлан аьркиншиврия тIутIисса тIийнма бур лагмава. Каруннищал, хъамамабитаванну зулла телефоннугу спирт дусса хъартсса салфеткардал кумаграйну марцI даван. Телефон марцI даван аьркинссар гьарца инсантал чIявусса кIанттая, автобусрава-маршруткалува бувккун махъ, ва чара бакъа – гьарца кьини – зузи кьини къуртал хьуну махъ. Дурсса хъиривлаявурттайн бувну, телефондалий унитазравунияр чIявусса микробру салкьи шайсса бур.
Мукунна кару ва телефон хъинссар марцI дурну личIи-личIисса бактериярттаща жува ххассал бувайсса хлоргексидиндалийгу.
* * *
Бюхъавай, кьатIу-шав инсантал бунийн мабуккаванну. Даврил ягу цамур иширал ялув инсаннащал хьунабакьин багьлагьисса иш бухьурча, кабинетравунияр, офисравунияр, кьатIув, гьавалий, инсантал чанний, хьунабакьияра, бюхъавай. Махъаллил хьияра инсантал чIявусса ва гьава къабухлахисса, лавкьусса кIанттурдая.
* * *
ЧIун-чIумуй тIитIлатIияра чIавахьулттив, къатлувусса, даврий кабинетравусса гьава марцI буккан.
* * *
Иммунитетрал цIакьшиврун дуччин дувара организм С витаминдалул. Му витамин чIявуссар цитрусрал ахъулссаннуву, кивилуву, имбирьдануву, цIил бувсса (квашеная) каландалуву. КIилийнусса мюнпат шайссар С витамин бусса ахъулсса – лимон, лайм, грейпфрут – чяйлувун дирчуний.
* * *
Эпидемиялул чIумал дакъа, укуннанийгу чIярусса щин хIачIаврия мюнпат бушиву кIулли жунма, оьтту хьюму буккан бувангу, организмалувусса вирусру дуккан дувангу. Хъиннува хъинссар щинал графиндалувун дачIи лимондалул сок дуртIуну, лимондалул щин дукра дукан ва дуркуну хIал лавгун махъ чан-чанну тIий хIачIлан.
ХIадур бувссар
Бадрижамал Аьлиевал
* * *
Эпидемиярттал ва вирусирттал сезоннал чIумал чIярусса щин ва мюнпатсса цаймигу хьюмушивуртту хIачIлачIаврил агьамшиву хъиннура ларай хъанахъиссар. ЧIярусса хьюмушиврул вирусру, лиян дурну, зирзуну гьан дувайссар.
* * *
Дукралул рациондалуву диялсса щюллишиву (уртту-щин) дикIан аьркинссар, щюллишиврул, организм витаминнал щаллу даву дакъасса, цIуму ва ххюттука марцI дуккан дувайссар, ми марцI дуккаврийнугу жулла иммунитет цIакь хъанахъиссар.
