Ноябрьданул 30-нний Республикалул Минэкономразвитиялий хьунни экономикалул аралувусса ДР-лул БакIчинал грантирттансса конкурсрал комиссиялул батIаву.
Микку ихтилат буллай, ДР-лул экономикалул ва территориярттал лябуккулул министрнал хъиривчу Светлана Аьбдулкьадировал бувсунни гьашину инсантурал документру буллай бивкIшиву электрон журалий «Ттул Дагъусттан» тIисса порталданийхчил.
Документру кьамул буллай бивкIун бур октябрьданул 7-нния ноябрьданул 18-ннийнин. Муксса хIаллай Дагъусттаннал Минэкономразвитиялийн дуркIун дур 10 заявка, миннувату 8 дур инсантураяту ва 2 – идаралия.
Гьурттучитурал Комиссиялул хьхьичIун ларсунни цалла хъиривлаявурттал хIасиллу, бувсунни миннуя республикалул экономикалун хьунтIисса мюнпатрая. Ми давуртту тIайла дуккантIиссар ххал дигьин ДР-лул БакIчинал Грантирттал советрайн, экспертътурал кьиматгу бивщуну, ххув хьуми личIи буваншиврул.
Конкурсрал хIасиллах бурувгун, дулунтIиссар 2 грант ца-ца 300 азарда къурушран.
