Щаххуллул гьивч (облепиха) ккаллиссар витаминнал ва микроэлементирттал ца яла аваданмур вацIлул ахъулссаннун (ягода). Витамин С гьарзасса ва фитонцидру бусса, миннуйну инсаннал иммунитет цIакь даврицIун хъунмасса кабакьу бувай­сса щаххуллул гьивчул сий цIанасса чIумал хъиннура ларай ла­хъан аьркинхьунссар.
ЧIун чIарах къадуркна, анавар буккияра щаххуллул гьивчул хъирив: чIаравсса неххамачIув ми батIин ягу чIаххуврайсса супермаркетрава-базаллува машан ласун, инсаннал цIуллу-сагъшиврун хъунмасса мюнпат бусса вацIлул ахъулссаннул инттунин, гъинттулнин луртан дуван.
Дахьасса къашавай шайхту, апттикIравун дарурттал хъирив къалечлай, аьдат хъанахъияра тIабиаьтралва жунма пишкаш був­сса даруртту ишла буллай.

---

* * *
Цува Гиппократ маслихIат буллай ивкIун ур щаххуллул гьивч дарувран ишла буллан. ХьхьичIазаманнул Грециянаву щахлу ва щаххуллул гьивч дучран буллай бивкIун бур, хаснува къашавайминнун, ми канакисса дучрал бурчул ва кьамарал тагьар итталун дагьанну ххуй хъанахъисса хIисав хьуну. Грек мазрайсса щаххуллул цIагу «цIай-цIайтIи чу» тIий таржума дуллай бур. Мукунма Грециянаву щаххуллул къяртрайну ва чIапIайну хъин буллай бивкIун бур талатавурттаву щавурду дирсса аьралитал ва дучри.
Аьвзалзаманнайва Китайнаву щаххуллул гьивч ккаллину бивкIун бур даруврал ххя­ххиялун.

* * *
Щаххуллул гьивчуву, яла-яларив къяртраву, чIявуссар сиротонин – «талихIрал гормон» («гормон счастья») тIий жунма кIулсса. Мунийн бувну щаххуллуйн «талихIрал мурхь» кунугу учай. Сиротониндалул агьамсса кумаг буллалиссар инсаннал нервардал система багьайкун зузаврин, щурущаврин, инсаннал дакIнил хIал-макьу ларай даврин. Сиротониндалул кьаралданийн бувну хьхьичIххуттай щикIалат ва банан дунугу, миннувунияр цимийлагу ххишалану му щаххуллул гьивчуву бусса бур.

* * *
Щаххуллул гьивчувусса витаминнал, микроэлементирттал хIат-хIисав дакъар: С, В1, В2, В3, В6, Е, РР, К, Р, фолиялул кислатIа (В9) ва чIярусса цаймигу органический ва аьгъу­сса кислатIартту, флавоноидру, фитонцидру, каротин ва каратиноидру, мах, бор ва чIярусса цаймигу.
* * *
Щаххуллул гьивчуву С витамин чIявусса бусса бур цитрусрал ахъулссаннувунияр.
Ххяхлан бивкIсса къалмувунияр Е витамингу кIилий чIявусса бур.

* * *
Щаххуллул гьивч щаращи бувну махъ ва микIлачIун бувну махъ мивусса витамин С бусса куццуй яшайсса бур, хIатта чIявугума шайсса бур микIлавчIун махъ.

* * *
Щаххуллул гьивчул ва щаххуллул чIапIал инсаннал чур­ххава дуккан дувайсса дур ххи­сса кислатIарду. Муния кумаг шайсса бур ревматизм ва подагра, сахарданул диабет дунийгу (чIапIал 10 граммрайн ца стакан щаращисса щинал бувтIуну, кIучI дурну, цаппара хIаллайсса диртун, хIачIлан).

* * *
Щаххуллул гьивч хъинну хъинссар инсан аьвкъу-гъили хьунийгу. Шивусса Е ва А витаминнал мукунма кумаг бувай­сса бур щаву ччяни лакьин, хъин дуван.
* * *
Щаххуллул гьивчуя дуванмур чIярур: сокру, аьгъушивуртту, отварду, настойкарду ва чIярусса цаймигу затру, инсан къашавай къахьун, къашавай хьуну махъ ччяни ччаннай ацIан, къюву хьхьара дуван, щаву хъин дуван ишла дуллансса.

* * *
Так щаххуллул гьивч мугъаятну ишла буллан аьркинну бур ттиликIрал, поджелудочная железалул, сситтукьучIлил (желчный пузырь), ххютукалул азарду, аллергия думиннан.
Гихунмайгу буссар