Декабрьданул15-нний журналистътуращал хьунаавкьунни республикалул Минсельхозпродрал каялувчи Абзагьир ХIусайнов. Брифинграй мунал бувсунни республикалий агьамми дукиялул сурсатирттал багьри цалий бацIан баншиврул буллалисса хIарачатирттал хIакъираву.
Абзагьир ХIусайновлул тIимунийну, республикалий ххира хьуну дур цаппара журалул бакIлахъия: къама, хIувукачар, ххяххиялул аьгъушиву ва мукунна ххира хъанай дур ахъулсса ва ахънилсса.
Министрнал тIимунийну, махъсса шанма зурул мутталий иникьали ххира хьуну дур 12%, хIувукачар ва ххяххиялул аьгъушиву – 15-20%. Мунал бувсунни ми сурсатру ххира циван хьуссаривгу, багьри лахъ хъанахъаву дацIан дуван буллалисса хIарачатирттаятугу.
ЧчатI ххира шаврил хIакъираву Абзагьир ХIусайновлул укун бувсунни. Вай гьантрай хьунабавкьуну бур ччатI шашай заводирттал ва хъунисса пекарнирдал каялувчитуращал, микку машварартту бувну, икьрал дурну дур цIусса шинайннин ччатIул багьа цалий бацIан буван. ЦIусса шиная махъ къама кьюкьин бюхъайссар тIий бур. Мунийн бувну, иникIмалул багьагу бюхъайссар цалий бацIан, ягу ялавай багьан.
ХIувукачарданул хIакъираву министрнал бусаврийну, гьашину качар хьхьичIми шиннардийнияр чанну бувну бур, амма хIувукачарданул луртан билаятрай гьасса дур. Качар чил билаятирттангу бахлай бухьувкун, мунил багьа лахъ хъанай бур. Му ттинияр тинмай ххира къахьунсса чараннаха зий бур.
