ДР-лул цIуллу-сагъшиву дуруччаврил министр Жамалуттин ХIажиибрагьимов ва ДР-лул ХIукуматрал Председательнал хъиривчу Анатолий Карибов вай гьантрай гьуртту хьунни Аьрасатнал цIуллу-сагъшиву дуруччаврил министр Михаил Мурашкощалсса видеосвязьрайсса конференциялий.
Конференция тIитIлай, Михаил Мурашкол бувсунни билаятрал регионнайсса коронавирусрал азардануцIун дархIусса аьмсса тагьардания. КIицI бунни ванал азар захIматну лахълай бушиву хронический азарду дусса, хъинну бучсса ва онкологиялул къашавайсса къашайшалтрал. Дагъусттаннайгу, билаятрал гайми регионнайгу хъуннасса къулагъас дуллай бусса бур лабораториярттай ца низам дуруччаврих, хIасил, ччясса мутталий азар дусса-дакъасса хъирив лавну, агьали азурда бан къабитаврих. Цукссагу къулай хьуну бур, азарханардай кунма, шаппа хъин хъанахъисса инсантуран медициналул кумаг баврил даражагу.
Жулла республикалий, COVID-19 азар дусса ягу дакъасса ххал дуллай, гьантлун 6222 хъиривлаяву дан бюхъайсса 13 лаборатория зий бусса бур. Миннува 4100 хъиривлаяву (65,7%) дансса шартIру дусса 7 лаборатория бусса бур ДР-лул ЦIуллу-сагъшиву дуруччаврил министерствалийн багьайсса. Республикалул Диагностикалул центрданий ва МахIачкъалаллал Диагностикалул центрданий медициналул полисрайхчIин кьинилун 210 инсан кьамул ан бюхъайсса КТ-аппаратру бусса бур.
Михаил Мурашкол мукунма кIицI бунни циняв регионнай дайдирхьушиву вакцинациялул цалчинмур ятIап.
«Вакцина бувсса гьарцаннал оьттуву хъиривми гьантрай антителарду ляхълай бур аьркинссаксса ккалданул. Ми инсаннал чурххаву 1,5 — 2 шинай яхьунтIиссар. Азарданущал талай, яла къизгъинний зузиминнал оьрмурду ххассал бавриву вакцина бакъа чара бакъассар», – кIицI бунни ванал.
Дагъусттаннай грипп къалахъан дурсса вакцинация цакьнира къуртал хьуссар. Вагу ОРВИ-лул азардания мюхчан бансса, коронавирусрал азар бигьану духIаншиврул дурсса агьамсса даврин ккаллиссар. Жулла республикалийн цIана бувкIун бур «Гам-КОВИД-Вак» тIисса вакциналул 2642 доза.
