Ниттил кьини

Ниттил кьини

ЧIяйннал шяраву

Ноябрь зурул 29-нний ЧIяйннал шяраваллил Культуралул къатлуву хьунни Ниттил кьинилун хас бувсса мажлис. Ва мажлисрал сиптачину бия шяраваллил Культуралул къатлул каялувчи СалихIат Алхасова.
Ва байран-кьини сакин дурну дур 1998-ку шинал Аьрасатнал Думалул депутатну бивкIсса хъамитайпалул, Кулпатрал ва жагьилтурал комитетрал каялувчину бивкIсса Алевтина Апаринал сипталийн бувну.

Культуралул къатлувун був­кIун бия гьарзасса оьрчIру бусса ниттихъул. Вай барча буллай, цIуллушиву чIа тIий, махъру лавхъуна: Айдаевал, Илдаровал, Шагьабу­ттиновал ва цайминналгу.
Ниттихъул барча буван увкуна ххуй-ххуйсса балайрдугу.

2-мур ЦIувкIуллал шяраву

Вара кьини 2-мур ЦIув­кIуллал шяраваллил Культуралул къатлувугу хьунни Ниттил кьинилун хас дурсса шадлугъ. Ши­ккун бувкIун бия цаппара ниттихъул. Вай барча бувна шяраваллил Культуралул къатлул каялувчи Рамазанова Халисатлул.
Ниттихъан хас бувсса шеърирду бувккуна дуклаки оьрчIал: Аьлиева Оксанал, Рамазанова Анитал, ЯхIияева Паридатлул, Рабаданова Эльмирал, Аьбдуллаева Сиянатлул. ОьрчIал ни­ттихъан бахшиш дуруна цалла дурсса, Ниттил кьинилун хас дурсса, суратругу.

Хьуна мукунма суратру дишаврил конкурсгу. Шикку ххув хьуна ЯхIияева Паридат.
Ниттил кьинилун хас дур­сса тяхъашивуртту хьунни мукунна вайми шяраваллавугу. ТIайлар, гьуртту хъанахъисса инсантал чанну бия, жула дянив ппив хъанахъисса коронавирус цIуцIаврия бурувччуну бикIан багьлагьишиврийн бувну.

Читайте также: